नाशिक : शिवसेनेचे प्रवक्ते खासदार संजय राऊत यांच्या नाशिक दौऱ्यानिमित्त काही कार्यक्रमांचे उद्‌घाटनाचे निमित्त करून एका नगरसेविकेच्या पतीने अधिकाऱ्यांकडून बेकायदा सुरू केलेली वसुली चर्चेत आली आहे. झेरॉक्स नगरसेवकाच्या या तगाद्यामुळे अधिकारी वर्गाला कार्यालये सोडून फिल्डवर जावे लागले, तर अनेक अधिकाऱ्यांनी मोबाईल स्वीच ऑफ करणे पसंत केले.कोरोना पहिल्या व दुसऱ्या लाटेत शहरात रुग्णालयांचे पेव फुटले. वैद्यकीय शिक्षण नसले तरी दोन- चार डॉक्टर एकत्र करून रुग्णालये थाटण्याचा नवा धंदा शहरात सुरू झाला.

कोरोनाकाळात रुग्णांना बेड व ऑक्सिजन मिळत नव्हते, त्या काळात बखळ कमाई काहींनी केली. कोरोना तिसरी लाट येण्याची शक्यता वर्तविली जात आहे. या लाटेतही अनेकांना हात धुवून घ्यायचे आहे. त्या अनुषंगाने राजकीय पक्षांच्या मोठ्या नेत्यांच्या हस्ते विविध उद्‌घाटने करण्याचा धडाका सुरू आहे. शिवसेना नेत्यांच्या हस्ते काही कामांचे उद्‌घाटने येत्या काळात होणार आहे. असेच एक उद्‌घाटन होत असून एका राजकीय पक्षाशी संबंधित असलेल्या या उद्‌घाटनासाठी एका नगरसेविकेच्या पतीने अधिकाऱ्यांकडून वर्गणी गोळा करण्याचा धडाका गेल्या दोन दिवसांपासून लावला आहे. महापालिकेचे अधिकारी वर्गणीच्या तगाद्यामुळे शुक्रवारी (ता.२२) मेटाकुटीला आले. अनेक अधिकाऱ्यांना कार्यालयात न बसता थेट फिल्डवर जाणे पसंत केले, तर काहींना भ्रमणध्वनी स्वीच ऑफ करावा लागला.

खासगी वर्गणीची खुमासदार चर्चा महापालिका वर्तुळात रंगली. आयजीच्या जिवावर बायजी करणाऱ्या झेरॉक्स नगरसेवकाच्या प्रतापामुळे डोक्याला हात लावण्याची वेळ अधिकाऱ्यांवर आली. महापालिकेच्या अधिकाऱ्यांकडून वसुलीच्या हातचलाखीवर मात्र सेना नेते काय भूमिका घेतात, हे पाहणे महत्त्वाचे ठरणार आहे.