Nashik News : अंबड लिंक रोडवरील संजीवनगरमध्ये सप्टेंबरमध्ये नाशिकमध्ये सुटीनिमित्त आलेल्या युवकाने आत्महत्या केल्याची घटना घडली होती.

याप्रकरणी पोलिसांच्या तपासाअंती मित्रांनी सतत ‘नशेडी’ असे हिणवत मित्रांमध्ये बदनामी केल्यानेच त्या युवकाने आत्महत्या केल्याचे समोर आले आहे.(youth committed suicide due to defamation among friends nashik crime news)

त्यानुसार तिघा मित्रांविरुद्ध आत्महत्येस प्रवृत्त केल्याचा गुन्हा दाखल करण्यात आला आहे सौरव संजयकुमार पांडेय (२५, रा. गजानन रो हाउस, संजीवनगर, अंबड) असे मयत युवकाचे नाव आहे. सौरव हा पुण्यातील खासगी आस्थापनांमध्ये कामाला होता.

११ सप्टेंबरपूर्वी काही दिवस आधी संजीवनगरमधील आई-वडिलांच्या घरी आला होता. सौरवला व्यसने जडल्याने तो नेहमी त्याच अवस्थेत राहत होता.मित्र संशयित अजय सरोज, विजय सरोज व अभी पवार (रा. नाशिक) हे तिघे सौरवला वारंवार ‘तू नशेडी आहेस, आमच्या सोबत राहत जाऊ नको’, असे बोलून त्यांची मित्रांमध्ये बदनामी केली.

तसेच मारून टाकण्याची धमकी देत वारंवार नशेडी म्हणून त्याला हिणवत असल्याने तो पुरता घाबरला होता. यामुळे त्याने तिघांच्या जाचास कंटाळून ११ सप्टेंबरला राहत्या घरात आत्महत्या केली.

तसेच आत्महत्या करण्यापूर्वी सौरवने आई अनिता हिस तिघा संशयितांची तक्रार केली होती व ते हिणवत असल्याचे सांगितले होते. याबाबत आकस्मिक मृत्यूच्या नोंदीचा तपास करण्यात आल्यावर सौरवची आई अनिता संजयकुमार पांडे यांच्या फिर्यादीनुसार गुन्हा दाखल करण्यात आला आहे. तपास पोलिस उपनिरीक्षक ए. के. पाडेकर करत आहेत.