Dhule News : मकरसंक्रांत आणि पतंग याचे एक अतूट नाते आहे. या सणानिमित्त लहानांपासून मोठ्यांपर्यंत पतंग उडविण्याचा आनंद लुटत असतात.

पतंग उडविण्यासाठी वापरला जाणारा मांजा हा अनेक वेळेला जीवघेणा ठरतोय. (Pigeons got stuck in net of moth area near Shindkheda bus stand dhule news)

याचा प्रत्यय शिंदखेडा शहरात आला. बसस्थानकाच्या शेजारी असलेल्या परिसरात आकाशात उडणाऱ्या पतंगाच्या मांजात कबुतर अडकले होते.

पाहणाऱ्यांच्या हे वेळीच लक्षात आल्याने कबुतर जमिनीवर आल्यानंतर त्याभोवती असलेला मांजा काढून कबुतराला जीवदान देण्यात आले व पुन्हा आकाशात सोडून देण्यात आले.

त्यामुळे पतंग उडविताना व त्याचा आनंद घेताना मोठ्यांनी व बालगोपालांनी पक्क्या मांजाचा वापर करू नये याची खबरदारी घ्यावी.

मांजामुळे अनेक वेळेला जीवघेण्या दुर्घटना घडतात. अशीच दुर्घटना शिंदखेडा शहरात घडली. शिंदखेडा बसस्थानकालगत शासकीय गुदामाच्या आवारात एक कबुतर पतंगाच्या मांजात अडकून तडफडत असल्याचे ‘सकाळ’चे शहर प्रतिनिधी जितेंद्र मेखे यांच्या लक्षात आले.

त्यांनी तत्काळ त्या ठिकाणी असलेल्या एसटी वाहक उमाजी वाडिले व स्वामी समर्थ विद्यालयातील नववीत शिकणारा विद्यार्थी कुंदन पावरा यांच्या मदतीने या कबुतराची सुखरूप सुटका केली.

तेथून जवळच असलेले दिनेश गोसावी यांच्या चहाच्या दुकानातून पाणी आणून त्या कबुतरास पाजले व जीवदान दिले. त्या कबुतराला पुन्हा आकाशात सोडून देण्यात आले. एका कबुतराचे प्राण वाचविण्याचे समाधान तिघांच्याही चेहऱ्यावर दिसत होते.