सायखेडा : सायखेडा येथे घर बंद असल्याची संधी साधत आज (ता.१०) पहाटेच्या सुमारास चोरट्यांनी घरफोडी करून दोन मोटारसायकल व दोन एलसीडी टीव्ही लंपास केले. या चोरीच्या घटनेने परिसरात खळबळ उडाली आहे.

सायखेडा येथे काॅलेजरोडवरील हिमालय काॅलनीत डॉ.आबा पाटील यांच्या बंगल्यात शिक्षक संतोष भुसे हे भाडेकरू म्हणून राहतात. दिवाळीनिमित्त ते घराला कुलूप लावून शुक्रवारी भावाकडे कुटुंबासह सिन्नरला गेले होते. आज (ता.१०) त्यांचा दुधवाला सकाळी आठ वाजता दूध देण्यास आला. तेव्हा त्याला बंगल्याचे गेट व घराचा दरवाजा उघडा दिसला. याबाबत त्याने संतोष भुसे आणि शेजाऱ्यांना सांगितले. त्यानंतर भुसे तातडीने  सिन्नरहून सायखेडा येथे आले.

सायखेडा पोलिस ठाण्याचे पोलिस निरीक्षक अंबादास मोरे पोलिस कर्मचाऱ्यांसह घटनास्थळी दाखल झाले. तसेच पोलिसांनी श्वानपथकालाही पाचारण केले. चोरट्यांनी घरातील दोन टीव्ही तसेच बंगल्याच्या आवारात पार्क केलेली पॅशन मोटरसायकल (एमएच 15 सीयू 1119) व हिरो मॅस्ट्रो मोपेडे (एमएच 15 ओएफ 2709) असा सुमारे 70 हजारांचा माल चोरून पलायन केले.

दरम्यान, या शांततेच्या परिसरात चोरीची घटना घडल्याने खळबळ उडाली आहे. याप्रकरणाचा तपास पोलिस निरीक्षक अंबादास मोरे यांच्या मार्गदर्शनाखाली सुरू आहे