Dhule Unseasonal Rain Damage : या वर्षी आधीच खरिपातील हंगामात शेतकऱ्यांना नुकसान सहन करावे लागले आहे. त्यातच अवकाळी पावसाने हजेरी लावल्याने कापूस, केळी, पपई, फळबागांचे नुकसान झाले आणि आता पसरणाऱ्या दाट धुक्यामुळे शेतकरी दुहेरी संकटात सापडला असून, रब्बी हंगामातील गहू, हरभरा यांसह टोमॅटो केळी, पपई, भाजीपाला उत्पादक शेतकरी चिंताग्रस्त झाला आहे.(sheet of fog spread in Babhalaj area dhule unseasonal rain damage news)

आधीच अवकाळी पावसाने झोडपले, त्यातच आधी बेजार झालेला शेतकरी सध्या पसरणाऱ्या दाट धुक्यामुळे शेतकऱ्यांची चिंता वाढली आहे. या दाट धुक्यामुळे याचा परिणाम टोमॅटो, केळी, पपई भाजीपाल्यासह गहू, हरभरा, मका या पिकांवर रोगाचा प्रादुर्भाव वाढण्याची शक्यता वर्तविण्यात येत असल्याचे शेतकऱ्यांनी सांगितले.

अवकाळी पावसामुळे तालुक्यातील कापूस, केळी, पपई, फळबागांचे अतोनात नुकसान झाले. त्या नुकसानातून सावरत नाही तेवढ्यातच या दाट धुक्यामुळे रब्बी हंगामातील पिके धोक्यात आल्याने शेतकरी चिंताग्रस्त झाला आहे. मांजरोद, पिळोदा शेतशिवारात शेतकऱ्यांनी टोमॅटो पिकाची लागवड मोठ्या प्रमाणात केली आहे.

टोमॅटो पिकासाठी लागवडीपासून ते उभारणी करण्यापर्यंत मोठ्या प्रमाणावर खर्च येतो. शेतकऱ्यांनी टोमॅटो पिकावर मोठ्या प्रमाणात खर्च केला असून, परिसरात पसरणाऱ्या दाट धुक्यामुळे टोमॅटो पिकावर याचा विपरीत परिणाम होण्याची दाट शक्यता असल्याचे शेतकऱ्यांनी सांगितले.

त्यामुळे टोमॅटो उत्पादक शेतकऱ्यांमध्ये चिंतेचे वातावरण निर्माण झाले असून, कृषी विभागाकडून योग्य मार्गदर्शन करण्यात यावे, अशी मागणी शेतकऱ्यांकडून करण्यात येत आहे. दाट धुक्यामुळे सर्दी, पडसे, खोकला, ताप इत्यादी आजार बळावण्याचीदेखील शक्यता असल्याचे बोलले जात आहे

''पंचवीस एकर क्षेत्रावर टोमॅटोची लागवड केली आहे. एक एकर क्षेत्राला कमीत कमी जवळपास ८०/९० हजार रुपयांचा खर्च येतो. मोठ्या प्रमाणावर खर्च करून टोमॅटो पिकाची लागवड केली आहे; परंतु २७ नोव्हेंबरला झालेल्या अवकाळी पावसामुळे टोमॅटो पिकाचे नुकसान झाले, तसेच सकाळी रोज होणाऱ्या धुक्यामुळे टोमॅटो पिकावर अळीचा प्रादुर्भाव मोठ्या प्रमाणावर दिसून येतो आहे.''-ललित पाटील, युवा शेतकरी, मांजरोद