यावल : येथील एकात्मिक आदिवासी विकास प्रकल्प कार्यालयातील तत्कालीन चार प्रकल्प अधिकाऱ्यांसह सहा जणांनी २० लाख ४२ हजारांचा गैरव्यवहार केल्याप्रकरणी येथील पोलिस ठाण्यात गुन्हा दाखल झाला आहे. यामुळे मोठी खळबळ उडाली आहे. हा गैरव्यवहार २००४ ते २००९ दरम्यान झालेला आहे. 

तत्कालीन प्रकल्प अधिकारी एस. टी. भालेराव यांचेविरुद्ध गैरव्यवहाराचे दोन गुन्हे दाखल करण्यात आले आहे. येथील एकात्मिक आदिवासी विकास प्रकल्प कार्यालयाच्या प्रकल्प अधिकारी विनिता सोनवणे यांनी दिलेल्या फिर्यादीनुसार यावल एकात्मिक आदिवासी विकास प्रकल्प कार्यालयामध्ये तत्कालीन प्रकल्प अधिकारी एस. टी. भालेराव, टी. बी. पाडवी, एन. एम. निकुंबे, जी. एन. वळवी, जळगाव येथील अन्नदाता कृषी संशोधन संस्थेचे अध्यक्ष, सचिव व व्हिलेज केमिकल सोसायटीच्या अध्यक्षांसह, अधिकाऱ्यांनी सन २००४ ते २००९ दरम्यान, संगनमत करुन अनुसूचित जमातीच्या शेतकऱ्यांसाठी लघू उपसा जलसिंचन योजना कामात तब्बल वीस लाख बेचाळीस हजार रुपयांचा गैरव्यवहार करून शासनाची फसवणूक करून, आर्थिक नुकसान केले. या प्रकरणी शासनाकडून उच्चस्तरीय चौकशी समिती गठीत करण्यात आली होती. या समितीने अपहाराचा ठपका ठेवत, पोलिस ठाण्यात फसवणूक प्रकरणी गुन्हा दाखल करण्यात आला आहे. तसेच एस. टी. भालेराव यांचेविरुद्ध पीव्हीसी पाइप गैरव्यवहाराचा दुसरा गुन्हा दाखल झाला आहे. यात प्रकल्प अधिकारी विनिता सोनवणे यांनी दिलेल्या फिर्यादीनुसार सन २००४ ते २००९ दरम्यान, तत्कालीन प्रकल्पाधिकारी भालेराव यांनी शासन निर्णय २००९ मधील कार्यप्रणालीचा भंग करून, शासन निर्णयाप्रमाणे लाभार्थींना पीव्हीसी पाइप वाटप न करता, बेकायदेशीर मार्गाने पीव्हीसी पाइप यांची विल्हेवाट लावली. यात ५ लाख २१ हजार ९९१ रुपयांचा गैरव्यवहार करून शासनाची फसवणूक करीत, आर्थिक नुकसान केले. म्हणून त्यांचे विरोधात स्वतंत्र गुन्हा दाखल करण्यात आला आहे. पोलिस निरीक्षक अरुण धनवडे यांचे मार्गदर्शनाखाली उपनिरीक्षक जितेंद्र खैरनार, हवालदार संजय तायडे तपास करीत आहेत.