नागपूर : प्रतापनगर पोलिस ठाण्याच्या हद्दीत राहणाऱ्या आयटी कंपनीमध्ये सॉफ्टवेअरचे काम करणाऱ्या युवकाची सायबर चोरट्याने सहा लाख १६ हजाराने फसवणूक केली. ही घटना २७ एप्रिलला उघडकीस आली.

विक्रांत दिलीप निनावे (वय २९, रा. पांडे ले आऊट) यांनी दिलेल्या तक्रारीवरुन पोलिसांनी सायबक चोरट्याविरोधात गुन्हा दाखल केला. पोलिसांनी दिलेल्या माहितीनुसार विक्रांत घरी असताना, त्याच्या मोबाईलवर १८ एप्रिलला प्रिती नावाच्या महिलेने ८९६५०५८५५० या क्रमांकावरुन व्हाटसअॅप कॉल केला.

यावेळी तिने स्वतःचे नाव ए.आर. प्रिती आहे असे सांगून त्यांच्या मोबाईलवर लिंक पाठवून कंपनीबाबत माहिती करून घ्या असे सांगीतले. यावेळी विक्रांतने लिंक ओपन केली असता त्याच्या बॅकेच्या खात्यातून वेळोवेळी एकुण ६ लाख १६ हजार रूपये ऑनलाइन डेबीट करून घेतले. याप्रकरणी त्यांनी दिलेल्या तक्रारीवरून प्रतापनगर पोलिसांनी सायबर चोरट्याविरोधात गुन्हा नोंदवून आरोपीचा शोध सुरू केला आहे.