मुंबई- काँग्रेसचे प्रदेशाध्यक्ष नाना पटोले यांच्यावर विरोधकांनी सध्या टीकेचे झोड उठवली आहे. नाना पटोलेंनी एका कार्यकर्त्याकडून आपले पाय धुऊन घेतल्याचा एक व्हिडिओ समोर आला आहे. व्हिडिओ मोठ्या प्रमाणात व्हायरल होत असून यावरून पटोलेंना विरोधकांनी घेरलं आहे. साम टीव्हीने यासंदर्भातील वृत्त दिलं आहे.

मिळालेल्या माहितीनुसार, अकोल्यामधील ही घटना आहे. पटोले जिल्ह्यातील वाडेगाव येथे एका कार्यक्रमासाठी आले होते. यावेळी त्यांचे पाय चिखलाने माखले होते. त्यावेळी एका कार्यकर्त्याने त्यांचे पाय धुतले आहेत. त्यामुळे विरोधकांना टीकेसाठी चांगला मुद्दा मिळाला आहे. राष्ट्रवादीचे प्रवक्ते अमोल मिटकरी यांनी यावरून पटोलेंवर निशाणा साधला आहे.

अशा प्रकारचे कृत्य करून पक्षाची काय धारणा आहे हे लक्षात येतं. ही अत्यंत संतापजनक घटना आहे. नेत्यांनी कार्यकर्त्यांकडून पाय धुऊन घेणे हा लोकशाहीचा आणि कार्यकर्त्याचा अपमान आहे. नाना पटोलेंनी स्वत:ला संत समजू नये. विशेष म्हणजे त्यांनी कार्यकर्त्याला नोकर समजू नये. कार्यकर्त्यांनी सुद्धा समजून घ्यावं की लोकशाहीमध्ये कोणी मालक नसतो. ही केवळ सत्तेची मस्ती आहे का असा सवाल मिटकरी यांनी विचारला आहे.

नेमकं काय झालं?

नाना पटोले वाडेगाव येथे मुक्कामी असलेल्या संत गजानन महाराज पालखीचे दर्शन घेण्यासाठी आले होते. पालखी नानासाहेब चिंचोळकर विद्यालयाच्या मैदानावर थांबली होती. पावसामुळे मैदानात मोठा चिखल झाला होता. नाना पटोलेंनी चिखलातून मार्ग काढत संत गजानन महाराज पालखीचे दर्शन घेतले. यावेळी नानांचे पाय चिखलात माखले होते. ते गाडीजवळ आल्यानंतर एका कार्यकर्त्याने त्यांचे पाय पाण्याने धुतले.

विजय गुरव असं या कायकर्त्याचे नाव असून तो बुलढाणा जिल्ह्यातील शेगाव येथील रहिवाशी आहे. गुरव हे काँग्रेसचे, विशेषत: नाना पटोलेंचे कट्टर समर्थक आहेत. त्यांच्या या कृतीमुळे नाना अडचणीत सापडले आहेत. विरोधकांनी त्यांच्यावर टीकेची झोड उठवण्यास सुरुवात केली आहे.