मारेगाव (जि. यवतमाळ) : मारहाण व खोट्या गुन्ह्यात अडकविण्याच्या धमकीमुळे अपमानित झालेल्या वृद्धाने मारहाण करणाऱ्‍याच्या घरासमोर जाऊन विषप्राशन केले. तब्बल १५ दिवस मृत्यूशी झूंज दिल्यानंतर अखेर रविवारी (ता. पाच) त्याचा मृत्यू झाला. नानाजी देवराव धानकी (वय ६०, रा. टाकळखेडा) असे मृताचे नाव आहे. आत्महत्येस प्रवृत्त करणाऱ्‍यांवर कारवाई होईस्तोवर मृतदेह न हलविण्याची भूमिका संतप्त नातेवाईकांनी घेतली होती. मात्र, पोलिसांच्या मध्यस्थीनंतर मृतदेह हलविण्यात आला.

नानाजी धानकी यांनी आठ महिन्यांपूर्वी घराशेजारी राहणाऱ्या नात्यातीलच विलास रामचंद्र धानकी याला ५० हजार रुपये आठ दिवसांत परत करण्याच्या बोलीवर उसने दिले होते. परंतु विलासने ठरल्याप्रमाणे पैसे परत केले नाही. नानाजी वारंवार विलासकडे पैशाची मागणी करायचे. २२ मे रोजीही नानाजींनी विलासकडे पैशाची मागणी केली. मात्र, आम्ही पैसे देत नाही, असे म्हणून विलास, त्याची पत्नी चंद्रकला, मुलगा मयूर व विठ्ठल रांगणकर (रा. मारेगाव) यांनी नानाजीला मारहाण केली व खोट्या गुन्ह्यात अडकविण्याची धमकी दिली.

मारहाणीमुळे व खोट्या गुन्ह्यात अडकविण्याच्या धमकीमुळे माझा अपमान झाला, मी आता जगून काय करू, असे बोलत नानाजीने कुटुंबीयांची नजर चुकवून विलास धानकी याच्याच घरासमोर जाऊन विष प्राशन केले. नानाजींच्या पत्नी, सुभद्राने गावकऱ्यांच्या मदतीने त्यांना तत्काळ वणी येथे खासगी रुग्णालयात उपचारासाठी दाखल केले. पंधरा दिवस मृत्यूशी झुंज दिल्यानंतर रविवारी रात्री ११ च्या सुमारास रुग्णालयात नानाजीचा मृत्यू झाला. सुभद्रा धानकी हिच्या तक्रारीवरून विलास धानकी, त्याची पत्नी चंद्रकला, मुलगा मयूर व विठ्ठल रांगणकर यांच्यावर गुन्हा दाखल करण्यात आला. पुढील तपास पोलिस करीत आहे.