आर्वी - तालुक्यातील रेती घाट सध्या पूर्णपणे बंद असताना रेती तस्कर ट्रकने रेतीची चोरी करत असल्याची माहिती येथील तहसील कार्यालयास मिळताच अचानक तहसीलदार विजय पवार नायब तहसीलदार आनंद देवकर व पथकाने पिंपळगाव रेती घाटात धाड घालून अवैधरित्या रेती भरलेल्या 5 ट्रकवर कारवाई केली. मात्र, यातील एका ट्रक चालकाने कारवाई सुरू असताना ट्रक घेऊन पळ काढल्याची घटना शनिवारी (ता.28) घडली.

नियंत्रण विभागाने चार ट्रक जप्त करून पुलगाव पोलिस स्टेशनला ठेवले असून पळून गेलेल्या ट्रक चालकावर गुन्हा दाखल करण्यात आला आहे. तालुक्यातील वर्धा नदी पात्रात पिंपळगाव रेती घाटात सकाळी अचानक खनिज तपासणी पथक प्रमुख नायब तहसीलदार देवकर पथकाने पाहणी केली असता वाहनात अवैधरित्या रेती भरत असलेले निदर्शनास आले त्यामुळे त्यावर पथकाने जप्तीची कारवाई सुरू केली.

ही कारवाई सुरू असताना एका वाहन चालकाला गाडीतून उतरण्याची सूचना केली. मात्र, मोबाईलवर बोलण्याचे निमित्त करून ट्रक मधील संपूर्ण रेती खाली करून व ट्रक चालू करून भरधाव वेगाने ट्रक पुलगावच्या दिशेने पळवून नेला. त्यामुळे, वाहन चालकावर गुन्हा दाखल केला आहे. तर, वाहनावर कारवाई करण्यात आली आहे.