अचलपूर : मागील काही महिन्यांपासून जिल्हा आरोग्य विभागाचा कारभार प्रभारींच्या भरवशावर सुरू आहे. त्यामुळे आरोग्य विभागाचा डोलारा कोलमडला आहे. आरोग्य विभागाला मुखीया नसल्याने डॉक्टर, कर्मचारी सुद्धा मनमानी कारभार करीत असल्याची ओरड आहे. शासन याकडे जाणीवपूर्वक दुर्लक्ष करीत असल्याचा आरोप होत आहे.

आरोग्यमंत्र्यांना मेळघाटची परिस्थिती माहीत असूनसुद्धा जिल्हा आरोग्य अधिकारी तथा मेळघाट अतिरिक्त जिल्हा आरोग्य अधिकारी यांची नेमणूक करण्यासाठी इतका विलंब का? असा प्रश्न आता उपस्थित केला जात आहे. तर कोणी अधिकारी देता का अधिकारी? म्हणण्याची वेळ जिल्हा वासियांवर आली आहे.

पावसाने दडी मारल्याने उकाडा वाढला आहे. त्यामुळे विषाणूजन्य व कीटकजन्य आजारांचे प्रमाण वाढले आहे. अशा स्थितीत नागरिकांच्या आरोग्याची जबाबदारी असणाऱ्या आरोग्य विभागाचा डोलारा कोलमडला आहे.

जिल्ह्यात जिल्हा आरोग्य अधिकारी, मेळघाटातील अतिरिक्त जिल्हा आरोग्य अधिकारी, चिखलदरा तालुका वैद्यकीय अधिकारी, जिल्हा हिवताप अधिकारी, जिल्हा हत्तीरोग अधिकारी, जिल्हा क्षयरोग अधिकारी ही महत्त्वाची पदे रिक्त आहेत.

कार्यरत वैद्यकीय अधिकाऱ्यांवर प्रभारी पदाचा अतिरिक्त भार सोपविला आहे. यातील अनेक पदे काही वर्षांपासून रिक्त आहेत. त्यामुळे नागरिकांच्या आरोग्याचा प्रश्न ऐरणीवर आला आहे. जिल्हा आरोग्य अधिकाऱ्यांचे स्थानांतरण झाले.

मेळघाटच्या दृष्टीने जिल्हा आरोग्य अधिकारी तथा अतिरिक्त जिल्हा आरोग्य अधिकाऱ्यांचे पद महत्त्वाचे आहे. ही दोन्ही पदे मागील काही महिन्यांपासून प्रभारींच्या भरवशावर सुरू आहेत. तर हिवताप व हत्तीरोग विभाग एकाच दावणीला बांधण्यात आले आहे.

जिल्हा हिवताप अधिकारी हे पद कित्येक महिन्यांपासून रिक्त आहे. अतिरिक्त प्रभारावरच काम सुरू आहे. सध्या साथीच्या आजारांचे थैमान सुरू आहे. त्यामुळे खासगी रुग्णालयासह शासकीय रुग्णालये फुल्ल झाली असल्याचे चित्र दिसून येत आहे.

जिल्ह्यात काही दिवसांपासून डोळ्यांचा आजार, थंडी, खोकला अशा आजारांचे रुग्ण मोठ्या प्रमाणात दिसून येत आहेत. वातावरण बदलामुळे तसेच व्हायरलमुळे रुग्णांना टायफॉईड, मलेरिया, डेंगी अशा आजारांची साथ सुरू आहे. जिल्ह्यातील नागरिकांवर कोणी अधिकारी देता का अशी म्हणण्याची वेळ आली आहे.