हिंगणघाट - कुख्यात गुंड गजानन खंगार ऊर्फ गज्या हंडी याचा जुन्या वैमनस्यातून शस्त्राने वार करून खून करण्यात आला. शास्त्री वॉर्डातील किसान जिनिंगसमोरील गंगामाता मंदिर मार्गावर शनिवारी (ता. ४) रात्री ७.३० ते ८ वाजताच्या दरम्यान ही घटना घडली. या प्रकरणात चार जणांना अटक करण्यात आली.

गज्या हंडी हा कुख्यात गुंड म्हणून ओळखला जायचा. तो गावठी दारूचा व्यवसाय करीत होता. शास्त्री वॉर्ड झोपडपट्टी परिसरात त्याची दहशत होती. या खुनातील संशयित आरोपी म्हणून सचिन क्षत्रीय, बंटी खडसे, मयूर कोराम या तिघांना शनिवारी (ता. ४) रात्री ताब्यात घेण्यात आले. मुख्य आरोपी प्रशांत ऊर्फ गोलू राऊत हा फरार झाला.

रात्री त्याला तळेगाव भारी, यवतमाळ येथून गुन्हे अन्वेषण विभागाचे उपनिरीक्षक राम खोत, रामकिशन इप्पर, सचिन इंगोले यांनी ताब्यात घेऊन हिंगणघाट पोलिस ठाण्यात आणले. या खुनाबाबत माहिती मिळताच ठाणेदार मारोती मुळीक पोलिसांसह घटनास्थळी दाखल झाले.

मृत गजानन उर्फ गज्या हंडी याचा जागीच मृत्यू झाल्याने त्याचा मृतदेह पोलिस गाडीनेच सामान्य उपजिल्हा रुग्णालयात शवविच्छेदनासाठी पाठविण्यात आला. या प्रकरणाचे गांभीर्य लक्षात घेत पोलिस अधीक्षक नुरुल हसन यांनी रविवारी दुपारी परििस्थतीची पाहणी करीत मार्गदर्शन केले. या परिसरात कोणताही अनुचित प्रकार घडू नये, याकरीता पोलिस तैनात करण्यात आले आहेत.