लाखनी (जि. भंडारा) : तालुक्‍यातील शिवणी (मोगरा) शिवारात विजेच्या प्रवाहाने हरणाची शिकार केल्याची घटना शुक्रवारी (ता. १८) पहाटे उघडकीस आली. यामुळे वनविभागात खळबळ उडाली आहे. वीज वितरण कंपनीच्या कर्मचाऱ्यांनी दिलेल्या सूचनेवरून वनविभागाची चमू घटनास्थळी दाखल झाली असून शिकार करणाऱ्या आरोपींचा शोध सुरू आहे.

शिवणी शिवारात वीज वितरण कंपनीचे ३३ केव्ही आणि ११ केव्हीचे उपकेंद्रे आहेत. या उच्च दाबाच्या वीज वाहिनीवर संशयित शिकाऱ्यांनी तारेचा आकडा टाकल्याने वीजपुरवठा बंद झाला होता. त्यामुळे बिघाडाचा शोध घेण्यासाठी लाइनमन खडसे, सतीश उके, श्री. ठाकरे हे गस्तीवर निघाले.

अवश्य वाचा : भारतातील सर्वाधिक लग्न या पाच कायद्याअंतर्गत होतात, जाणून घ्या या कायद्यांविषयी

त्यांना धर्मराज राइस मिलच्या मागे शेतात उच्च दाबाच्या वाहिनीच्या तारांवर तारेचा आकडा टाकून २०० ते ३०० फूट लांब खुट्या ठोकून तार लांबविल्याचे दिसून आले. याच तारेचा स्पर्श झाल्याने एक मृत हरिणही दिसून आले. त्यामुळे शिकाऱ्यांनी हरणाच्या शिकारीसाठी विद्युत तारेमध्ये वीज प्रवाह सोडल्याचे स्पष्ट झाले.

शिकाऱ्यांचा शोध सुरू

वीज वितरण कंपनीच्या कर्मचाऱ्यांनी याबाबत वनविभागाला घटनेची माहिती दिली. लाखनीचे वनक्षेत्रसहायक राऊत वन कर्मचाऱ्यांसह घटनास्थळी दाखल झाले. मृत हरणाचा पंचनामा करून शवविच्छेदनासाठी पोहरा येथील पशुवैद्यकीय अधिकारी डॉ. चोपकर यांना पाचारण करण्यात आले. वनविभागाची चमू शिकाऱ्याचा शोध घेत आहे.

हेही वाचा : कोरोना झालेल्या रुग्णांना फुप्फुसाचे विकार; पाच युवकांवर सुरू आहे नागपुरात उपचार

वन्यप्राण्यांच्या जीवाला धोका

लाखनी वनपरिक्षेत्रात हरिण, रानडुक्कर, ससा यांसारख्या तृणभक्षक प्राण्यांच्या शिकारीत मोठ्या प्रमाणात वाढ झाली आहे. त्यामुळे वन्यप्राण्यांच्या जीवाला धोका निर्माण झाला आहे. या घटनांवर अंकुश लावण्याची मागणी होत असून शिकाऱ्यांना पकडण्याची मोहीम तीव्र करण्यात आली आहे. ग्रामीण भागात वन्यप्राणी पाण्याच्या शोधासाठी गावाच्या शिवारात येत आहेत. नेमके याच संधीचा फायदा शिकारी घेत आहेत.
 

(संपादन : दुलिराम रहांगडाले)