हिंगणी (जि. वर्धा) : विवाहापासून तर कथेपर्यंतचे सर्व चालीरिती पार पडल्या. मात्र, आपल्या आयुष्यभराच्या जोडीदारासोबत वैवाहिक जीवनाला सुरुवात करण्याआधीच त्याच्यावर काळाने झडप घातली. सासुरवाडीतून सत्यनारायणाची कथा आटोपून घरी नववधूसह सुखरूप पोहोचण्याऐवजी सुभाषचा मृतदेहच घरी पोहोचला. जे घर मुलाच्या लग्नाने आनंदाने भारावून गेले होते, त्या कुटुंबासह अख्खं गाव सुन्न झालं. 

हेही वाचा - वनपरिक्षेत्र अधिकारी दीपाली चव्हाणच्या आत्महत्याप्रकरणात समोर आले धक्कादायक कारण, आएफएस...

सुभाष दशरथ मराठे (वय 28) रा. हिंगणी असे मृताचे नाव आहे. स्थानिक पुरातन शिवमंदिर परिसरात राहणाऱ्या सुभाष मराठे याचा विवाह 19 मार्च रोजी चामोर्शी जि. गडचिरोली येथे वधू मंडपी धूमधडाक्‍यात अनेक लोकांच्या उपस्थितीत पार पडला. सुभाष हा घरचा मोठा मुलगा असून तोच कमावता होता. तो नागपूर जिल्ह्यातील हिंगणा येथील लोहा कंपनीत साहित्य गुणवत्ता तपासणी पदावर कार्यरत होता. तो कथेसाठी नववधूसोबत चामोर्शी येथे गेला होता. 24 मार्च रोजी सकाळी कथा आटोपल्यावर जेवणावळी सुरू होत्या. लग्नाच्या लगबगीचा भार एकट्यावर असल्याने चांगलीच दगदग झाली होती. कथा झाल्यावर उसंत मिळाल्याने तो विश्रांती घेत असता त्याला अस्वस्थ वाटू लागले. त्यामुळे त्याने विश्रांती घेतली. यानंतर थोडे बरे वाटू लागेल, असे त्याला वाटले. मात्र, काही वेळातच त्याने नेहमीसाठीच न परतण्यासाठी जीवनातून विश्रांती घेतल्याने सर्वत्र हळहळ व्यक्त करण्यात येत आहे. 

हेही वाचा - 'मेडिकल'च ठरतेय कोरोनाचे हॉटस्पॉट, कोरोनाबाधित अन् सारीचे रुग्ण एकाच वॉर्डात

बुधवारी (ता. 24) सायंकाळी त्याचे पार्थिव घेऊनच नववधू सेलूला पोहोचली. गुरुवारी त्याच्यावर स्थानिक मोक्षधामात अंत्यसंस्कार करण्यात आले. सुभाष हा स्थानिक इसार पेट्रोल पंपचे व्यवस्थापक पंकज पुरुषोत्तम वाल्दे याचा मामे भाऊ असून त्याच्या पश्‍चात वृद्ध आईवडील, नवविवाहित पत्नी व लहान भाऊ, असा आप्त परिवार आहे.