नागपूर : उपराजधानीतील वाहतूक व्यवस्था अधिक सक्षम करण्यासाठी मनपाने पुढाकार घेतला आहे. यासाठी केंद्र सरकारच्या योजनांमार्फत १५० ई-बसेसची मागणी केली आहे. केंद्र शासनाच्या गृहनिर्माण व शहरी व्यवहार मंत्रालयाद्वारे पीएम ई-बस योजना सुरू करण्यात आली आहे. मनपालाही ई-बसेस मिळाव्यात म्हणून राज्य सरकारला मनपाद्वारे प्रस्ताव पाठविण्यात आला आहे.

महानगरपालिकेद्वारे ‘आपली बस’ ही शहर परिवहन सेवा दिली जाते. सध्या मनपाच्या परिवहन विभागातर्फे सार्वजनिक बस सेवा ही पारंपारिक डिझेल इंधनावरून अपारंपरिक इंधनाकडे वळविण्याचे धोरण राबविण्यात येत आहे. या अंतर्गत ‘आपली बस’च्या ताफ्यात ई-बसेसचा समावेश करण्यात आलेला आहे.

मार्गदर्शक तत्वांची पूर्तता

ई-बसेस सुरू होण्यापूर्वी शहरांना वीज व पायाभूत सुविधांची पुरेशी क्षमता सुनिश्चित करावी लागेल आदी बाबी केंद्राच्या ‘पीएम ई-बस’ योजनेच्या मार्गदर्शक तत्वांमध्ये अंतर्भूत आहेत. या तत्त्वांचा अवलंब करून परिवहन विभागाच्या वतीने रितसर प्रस्ताव तयार करण्यात आला व तो प्रस्ताव सर्व आवश्यक बाबींची पडताळणी करून आयुक्तांनी राज्य शासनाला पाठविला आहे.

शहरातील सध्याची स्थिती

• ५२८ : एकूण सेवेत बस

• १६७ : स्टॅंडर्ड बस

• १५० : मिडी बस

• ४५ : मिनी बस

• ३६२ : डिझेल बस

• ७० : रेट्रोफिटींग सीएनजी बस

• ९६ : ई बसेस