कामठी (जि. नागपूर) : स्थानिक जुनी कामठी पोलिस ठाण्याच्या हद्दीत येणाऱ्या खैरी गावातील ग्रा.पं. सदस्य प्रीती मंगेश मानकर यांच्या घरावर शेजारी राहणाऱ्या मंडळींनी लाठीकाठीने हल्ला चढविला. घरासमोरचा गेट पाडून हल्लेखोरांनी नासधूस केली. भीतीपोटी महिला ग्रा.पं. सदस्य कुटुंबासह दार आतून कुलूपबंद करून दडी मारून लपल्याने अनुचित घटना घडली. ही घटना १२ डिसेंबरला रात्री साडेआठ वाजताच्या सुमारास घडली.

पीडिता ग्रा. पं. सदस्य प्रीती मानकर यांनी जुनी कामठी पोलिस ठाण्यात दिलेल्या तक्रारीनुसार ग्रा.पं. सदस्य यांना मागील दहा वर्षांपासून शेजारील मंडळीकडून कुठल्या ना कुठल्या कारणावरून होत असलेल्या क्षुल्लक भांडणातून मानसिक त्रास होत आहे. शनिवारी (ता. १२) रात्री आठच्या सुमारास गावातील कुत्र्यांना हाकलून लावले असता शेजारी असलेले मारोती ठाकरे व कुटुंबीयांनी महिलेच्या घरावर लाठीकाठी व सब्बलने हल्ला चढविला.

कुत्र्याला का मारले, यावरून जातीवाचक शिवीगाळ करीत ‘तुम्ही इथे राहण्याच्या लायकीचे नाहीत. फुकटच्या घरात राहता, आपल्या मोहल्यात जा’ असे म्हणत घराचे गेट तोडले. दार आतून कुलूपबंद करून असल्याने गैरअर्जदारांना घरात शिरणे शक्य झाले नाही. दडी मारून भीतीने लपून बसलेल्या ग्रां.प. सदस्य प्रीती मानकर व कुटुंबीयांनी त्वरित पोलिसांना माहिती दिली.

हेही वाचा - अंकिता जळीतकांड : पहिल्याच दिवशी आरोपीचे वकील गैरहजर; गुरुवारी देतील आरोपावर उत्तर

वेळीच पोलिस पोहोचल्याने मोठा अनर्थ टळला. दरम्यान भांडण झालेल्या दोन्ही मंडळींनी पोलिस ठाण्यात तक्रार घेण्यात आली. बातमी लिहितोवर पोलिसांनी गुन्हा दाखल केला नव्हता. मात्र, भीतीमय स्थितीत असलेल्या व जातीवादाचा अपमान सहन करून बसलेल्या ग्रां.प. सदस्य प्रीती मानकर व कुटुंब यांच्या जीविताला धोका निर्माण झाला असून ते न्यायाची मागणी करीत आहेत.

संपादन - नीलेश डाखोरे