Nagpur Central Railway: विनाकारण साखळी ओढण्याच्या घटनेमुळे गेल्या आठ महिन्यात १ हजार ७५ रेल्वेगाड्यांना विलंब झाला आहे. प्रवाशांना होणारा मनस्ताप लक्षात घेऊन मध्य रेल्वे प्रशासनाने अधिक कडक पावले उचलली आहे.

प्रवासादरम्यान विनाकारण साखळी ओढल्यास आता प्रवाशाच्या खिशाला हजाराचा फटका बसणार आहे. त्यामुळे प्रवाशांनी साखळी ओढण्यापूर्वी सावधगिरी बाळगण्याची गरज आहे. रेल्वे कायद्याच्या कलम १४२ नुसार दंडाची तसारतूद आहे. रेल्वेने केलेल्या कारवाईत ७९३ जणांकडून २ लाख ७२ हजार रुपयांचा दंड वसूल करण्यात आला आहे.

साखळी ओढल्यानंतर लोको पायलटला माहिती होते. यानंतर रेल्वे थांबवावी लागते. प्रवासी संकटात असल्यास त्याला मदत करण्यासाठी रेल्वेने चेन पुलिंगची सुविधा दिली आहे. मात्र, एकदा रेल्वे थांबल्यानंतर रेल्वेची २० मिनिटे व्यर्थ जातात. ट्रेन थांबविणे आणि पुन्हा मार्गस्थ करण्यासाठी किमान २० मिनिटे लागतात. (Latest Marathi News)

याशिवाय रेल्वेचे वेळापत्रक विस्कळित होत असते. रेल्वे गाडीच्या मागून धावणाऱ्या अन्य सर्वच गाड्यांच्या वेळापत्रकावर सुद्धा परिणाम होत असतो. रेल्वेगाडीच्या मागे इतर धावणाऱ्या सर्व रेल्वेगाड्यांना अलर्ट देऊन गाडी थांबवीत असल्याची माहिती दिली जाते. रेल्वे थांबविण्यापूर्वी प्रवाशांनी रेल्वेच्या सुरक्षेचा विचार करावा, असे आवाहन मध्य रेल्वेने केले आहे.