Akola agriculture News: जिल्ह्यातील १४ हजार ४२१ शेतकऱ्यांची ई-केवायसी अद्यापही अपूर्ण आहे. त्यामुळे संबंधित शेतकरी पीएम किसान योजनेच्या आगामी १६व्या हप्त्याला मुकण्याची शक्यता आहे. त्यामुळे शेतकऱ्यांनी आपले सरकार सेवा केंद्रात जाऊन ई-केवायसी करून घेण्याचे आवाहन कृषी विभागामार्फत करण्यात आले आहे.

पंतप्रधान किसान सन्मान निधी योजना (पीएम-किसान) ही देशातील सिमांत तसेच अल्प भूधारक शेतकऱ्यांसाठी लाभ देणारी सर्वात महत्वाची योजना आहे. योजनेच्या माध्यमातून शेतकऱ्यांना दरवर्षी सहा हजार रुपयांचा लाभ दिला जातो.

शेतकऱ्यांच्या खात्यात थेट हस्तांतरणाच्या माध्यमातून हे पैसे जमा केले जात असल्याने शेतकऱ्यांना त्वरीत या पैशांचा वापरही करता येतो. ‘पीएम किसान’ संकेतस्थळावर जावून लाभार्थ्यांना थेट अर्ज करता येतो. या सुविधेमुळे शेतकऱ्यांना कोणत्याही दलाल अथवा मध्यस्थाशिवाय एक रुपयाही खर्च न करता पंतप्रधान किसान सन्मान योजनेत आपले नाव नोंदवता येत आहे. (Latest Marathi News)

त्यामुळे सरकारी कार्यालयांच्या पायऱ्या झिजवण्याच्या कटकटीपासून शेतकऱ्यांची सुटका झाली आहे. दरम्यान जिल्ह्यात ६ डिसेंबर २०२३ पर्यंत १ लाख ९० हजार ६४८ शेतकरी कुटुंबांनी पीएम किसान सन्मान निधी योजनेत नोंदणी केलेली असून त्यापैकी जमिनीचा तपशील अद्ययावत करणे, बँक खाते आधार संलग्न करणे व ई-केवायसी प्रमाणीकरण करणे याकरिता एकूण १४ हजार ४२१ लाभार्थी प्रलंबित आहेत. त्यामुळे जानेवारी २०२४ मध्ये वितरित होणाऱ्या १६ व्या हप्त्याच्या लाभापासून संबंधित शेतकरी वंचित राहू शकतात, अशी शक्यता आहे.