Nagpur Cafe Owner Abducted and Beaten: प्रेयसीसोबत अनैतिक संबंध असल्याच्या संशयावरून आठ गुंडांनी चाकूच्या धाकावर एका कॅफेमालकाचे भरदिवसा अपहरण केले. त्यानंतर त्याला निर्जनस्थळी नेत बेदम मारहाण केली. राणाप्रतापनगर पोलिस ठाण्याच्या हद्दीत घडली. या प्रकारामुळे परिसरात खळबळ उडाली आहे.

संतोष नरेश जोगेकर (२५) असे तक्रारदाराचे नाव आहे. पोलिसांनी दिलेल्या माहितीनुसार हिंगणा टी पॉईंट परिसरात त्याचे कॅफे आहे. सोमवारी दुपारी साडेतीन वाजताच्या सुमारास तो कॅफेमध्येच असताना तीन तरुण आले. सुरुवातीला त्यांनी बर्थडे पार्टीसाठी कॅफे हवा असल्याचे सांगितले. थोड्या वेळात तोंडावर रुमाल बांधून एक तरुण आला. त्याने संतोषला त्याचे नाव विचारले. त्यानंतर अचानक चौघांनीही शिवीगाळ करत संतोषला मारहाण केली.

तरुणाने रुमाल काढला असता तो हर्षल ब्राह्मणे (वय २५, रा. दाते लेआऊट) असल्याचे संतोषने ओळखले. हर्षलने खिशातून चाकू काढत संतोषला फरफटत कॅफेबाहेर आणले. त्याच्या हातात चाकू असल्याने इतर कुणी बचावासाठी समोर आले नाही. हर्षलचे आणखी पाच साथीदार बाहेर उभे होते. (Latest Marathi News)

आरोपींनी संतोषला जबरदस्तीने मोटारसायकलवर बसविले व अजनी रेल्वे कॉलनीजवळील मैदानावर नेले. तेथे एका मुलीला किती वेळा भेटलास, अशी विचारणा हर्षलने केली. यानंतर हर्षलने परत संतोषला मारहाण केली. सायंकाळी दोन आरोपींनी मोटारसायकलवरच संतोषला परत कॅफेजवळ सोडले. त्याने राणाप्रतापनगर पोलिस ठाण्यात तक्रार केली. पोलिसांनी हर्षल व त्याच्या सात साथीदारांविरोधात गुन्हा दाखल केला.