संतापजनक! शंभर रुपयांसाठी मुलाकडून आईचा खून, भोकरबर्डी येथील घटना

Nagpur Dharni Son killed Mother: आईने शंभर रुपये दिले नाहीत म्हणून संतप्त झालेल्या मुलाने तिचा खून केल्याची धक्कादायक घटना धारणी तालुक्यातील भोकरबर्डी गावात शुक्रवारी (ता. एक) रात्रीच्या सुमारास घडली. गंगाबाई जांबेकर (वय ६०) असे खून झालेल्या महिलेचे नाव आहे.

गंगाबाई यांनी शंभर रुपये न दिल्यामुळे रागाच्या भरात मुलगा पवनने त्यांना काठीने बेदम मारहाण केली. यात त्यांचा मृत्यू झाला. गावातील रोहित पाल यांनी धारणी पोलिसांना या घटनेची माहिती दिली. घटनेची माहिती मिळताच पोलिसांनी भोकरबर्डी येथील ग्रामस्थांकडे विचारणा केली असता पवन हा व्यसनाच्या आहारी गेला असल्याचे त्यांना समजले.

शंभर रुपयांसाठी त्याने आईला काठीने बेदम मारहाण केल्याचेही गावकऱ्यांनी पोलिसांना सांगितले. धारणीचे ठाणेदार अशोक जाधव यांनी संशयित मारेकरी मुलास ताब्यात घेऊन ठाण्यात आणले. पवन याच्याविरुद्ध धारणी पोलिसांनी खुनाचा गुन्हा दाखल करून अटक केली आहे. ठाणेदार जाधव, उपनिरीक्षक विशाल राठोड, उपनिरीक्षक झाल्टे, धीरज जांबे, ईश्वर, नितीन बोरसिया आदींनी घटनास्थळी भेट दिली. (Latest Marathi News)

मुलाने आईचा खून केल्याची माहिती मिळताच भोकरबर्डी येथे पोहोचून आरोपी पवन जांबेकर याला अटक केली. पंचनामा करून गंगाबाई यांचा मृतदेह ग्रामीण रुग्णालयात शवविच्छेदनासाठी पाठविला आहे. अहवालानंतर पुढील कारवाई करण्यात येईल.- अशोक जाधव, ठाणेदार, धारणी