नागपूर : महापालिकेतर्फे रविवारी सकाळी स्वच्छता दौडचे आयोजन करण्यात आले होते. यामध्ये ठिकठिकाणी लावलेल्या बॅनरमध्ये अशोक चक्रावर झाडू ठेवण्यात आल्याचे दर्शविण्यात आल्याने खळबळ उडाली आहे. विशेष म्हणजे, माजी मंत्री आणि आमदार डॉ. नितीन राऊत यांनी याविरोधात सीताबर्डी पोलिस ठाण्यात तक्रार दाखल केली आहे. यावेळी ठाण्यात जमाव आल्याने तणावाचे वातावरण निर्माण झाले होते.

केंद्राच्या स्वच्छता मोहिमेंतर्गत जनजागृतीकरिता महानगरपालिकेच्या माध्यमातून विविध उपक्रम राबविण्यात येत आहेत. यानुसार रविवारी (ता.२२) सकाळी साडेसहा वाजताच्या सुमारास स्वच्छता दौडचे आयोजन करण्यात आले होते.

त्यासाठी महापालिकेकडून जय्यत तयारी करण्यात आली. स्वच्छतेचा संदेश देणारे बॅनरही लावण्यात आले होते. मात्र, या बॅनरमध्ये अशोक चक्रावर झाडू लावलेला लोगो असल्याची बाब निदर्शनास आली. त्यावर माजी मंत्री आणि आमदार डॉ. नितीन राऊत यांनी आक्षेप घेतला.

याबाबत त्यांनी प्रथम सदर पोलिस ठाण्यात तक्रार दिली. त्यांनी राष्ट्रीय गौरव अपमान निवारण अधिनियम १९७१ च्या कलम २ अन्वये महापालिकेच्या दोषी अधिकाऱ्यांवर गुन्हा दाखल करण्याची मागणी केली. मात्र, हद्द सीताबर्डी ठाण्याची असल्याने त्यांनी सीताबर्डी ठाण्यात पाठविले. सायंकाळी मोठ्या संख्येने कार्यकर्ते सीताबर्डी ठाण्यात पोहचले.

कार्यकर्त्यांनी घोषणाबाजी सुरू केली. त्यामुळे तणावाचे वातावरण निर्माण झाले होते. दरम्यान ठाण्यात पोलिस उपायुक्त राहुल मदने यांच्यासह वरिष्ठ अधिकारी दाखल झाले. त्यांनी परिस्थिती नियंत्रणात आणली. चौकशी करून कारवाई करणार असल्याची माहिती आहे.

राष्ट्रीय चिन्ह अशोक चक्राला मनपाने पायदळी तुडवत असल्याचे बॅनरवर दाखविले आहे. यावरून देशाचे, राष्ट्रीय झेंड्याचे, राष्ट्रीय चिन्हाचे महत्त्व कमी करण्याचा हा प्रयत्न भाजप आणि नागपूर महानगर पालिकेच्या अधिकाऱ्यांनी सूडबुद्धीने केला आहे.

- डॉ. नितीन राऊत, माजी मंत्री आणि आमदार