Nagpur Petroleam Company Investment Fraud: पेट्रोलियम कंपनीमध्ये गुंतवणूक केल्यास तीस टक्के नफा देण्याचे आमिष दाखवित एका व्यापाऱ्याला दोन कोटी रुपयांनी फसवणूक केली आहे. याप्रकरणी लतिश कुमार भरतन (रा. रामनगर तेलंगखेडी) यांच्या तक्रारीवरून अंबाझरी पोलिस ठाण्याचा केरळच्या तिघांविरोधात फसवणुकीचा गुन्हा दाखल केला असून तपास आर्थिक गुन्हे शाखेचे पथक करीत आहे.

विजयन पिल्लई, विजयाकुमारी पिल्लई आणि नझीम हनीफा रॉथर अशी आरोपींची नावे असून ते केरळमधील कन्ननकुझी मुरी, अल्लापूजा येथील रहिवासी आहेत. पोलिसांनी दिलेल्या माहितीनुसार, तिघेही लतीश कुमार यांच्या ओळखीचे असून २०१२ मध्ये लतीश यांच्यासोबत संपर्क साधून जया फ्युअल्स पेट्रोलियममध्ये गुंतवणूक केल्यास ३० टक्के परतावा देण्याची तयारी दाखविली होती. (Latest Marathi News)

लतीश यांनी त्यांच्यावर विश्वास दाखवित गुंतवणूक केली. मात्र, आजवर कोणताही लाभ दिला नाही. त्यांनी मोबदल्याची मागणी केली असता आरोपींनी टाळाटाळ केली. वाढत्या दबावामुळे आरोपींनी पुढील तारखेचे एकूण १ कोटी ८४ लाख ९४ हजार रुपयांचे २ धनादेश दिले. मात्र, ते वटले नाहीत. त्यानंतर आरोपींसोबत संपर्क साधला असता तो होऊ शकला नाही. फसवणूक झाल्याचे लक्षात येताच त्यांनी अंबाझरी ठाणे गाठून तक्रार दिली. पोलिसांनी प्रकरण आर्थिक शाखेकडे वर्ग केले आहे.