Nagpur Sand Mafiya: जिल्ह्यात वाळू तस्करीला आळा घालण्यासाठी वाठोडा भागात कारवाई करताना तहसील कार्यालयाच्या मंडळ अधिकाऱ्याला वाळू माफियांच्या टोळीने चक्क घेराव घातला, शिवीगाळ करून ठार मारण्याची धमकी दिली. ही घटना रविवारी सकाळी ६.३० वाजताच्या सुमारास घडली.

विशेष म्हणजे आरोपी सर्व क्रेटा व ब्रिझा या चारचाकी वाहनाने आले होते. त्या कारला नंबर प्लेटही नव्हती. रामटेकच्या एसडीओ वंदना सवरंगपते यांच्यावरील हल्ल्याचे प्रकरण ताजे असताना वाठोड्यातील या घटनेमुळे तहसील कार्यालयातील अधिकारी धास्तावले आहेत.

मंडळ अधिकारी अनिल ब्रम्हे (५३) रा. सक्करदरा हे पथकासह बहादुरा फाटा, उमरेड मार्गावर वाळूची वाहतूक करणाऱ्या ट्रकवर कारवाई करीत होते. दरम्यान सकाळी ६.३० वाजताच्या सुमारास आरोपी ट्रक चालक अशरफ खान (२९) रा. खरबी आणि ट्रक मालक जावेद खान (३२) रा. बाबा फरीदनगर हे वाळूचा ट्रक घेऊन जात असताना पथकाने थांबविले. ट्रकची तपासणी करताना आरोपींनी पाच ते सहा अनोळखी इसमांना बोलाविले. (Latest Marathi News)

त्या सर्वांनी मंडळ अधिकाऱ्याचा घेराव केला. शिवीगाळ करून धक्काबुक्की केली तसेच जिवानिशी ठार मारण्याची धमकी देऊन पळून गेले. घाबरलेले ब्रम्हे यांनी वाठोडा पोलिस ठाणे गाठून घटनेची माहिती दिली. प्रकरणाचे गांभीर्य लक्षात घेऊन पोलिसांनी आरोपी विरुद्ध गुन्हा नोंदवून दोघांना अटक केली.

का निर्ढावले वाळू तस्कर ?

सरकारने वाळूचा लिलाव बंद केला आहे. आता डेपोच्या माध्यमातून ऑनलाईन मागणीद्वारे वाळूचा पुरवठा केला जातो. मात्र, हे धोरण नागरिकांसाठी अडचणीचे ठरत आहे. वाळूचा पुरवठा होत नसल्याने बांधकाम प्रभावित झाले आहे. त्याचा फायदा वाळू माफिया घेत आहेत. तसेच शासनाचा लाखो रुपयांचा महसूल बुडविणारी वाळू माफियांची टोळी सक्रिय आहे. अनेक दशकापासून त्यांचे एक छत्री राज्य सुरू आहे. (Latest Marathi News)