Nagpur News : राष्ट्रवादी पक्षात उभी फुट पडली असतानाही दोन्ही गटाकडून मात्र एकच पक्ष कार्यालय ठेवण्यात आले. आमचाच पक्ष खरा असल्याने वेगळे कक्ष मागण्याची गरज नसल्याचे राष्ट्रवादीचे नेते जयंत पाटील यांच्याकडून काल स्पष्ट करण्यात आल्यानंतर आज जितेंद्र आव्हाड यांच्या नावाची पाटी काढण्यात आली.

त्यामुळे पक्षात फुट असल्याचे दिसून आले. दरम्यान आज बहुतांश सदस्यांनी कार्यालयात जाणे टाळल्याचे चित्र होते. त्यामुळे आता शरद पवार गटातील सदस्य कुठे बसतात, हेच पाहणे महत्त्वाचे ठरणार आहे.

विधिमंडळाच्या दरबारी दोन्ही गट एकच असल्याने जुन्यानुसारच आव्हाड यांची पाटी पक्ष कार्यालयात लावण्यात आली. परंतु आज सकाळीच त्यांची पाटी काढून मंत्री अनिल पाटील यांची मुख्य प्रतोदची पाटी लावण्यात आली.

विधिमंडळ परिसरात दिवसभर हाच चर्चेचा विषय होता. दरम्यान सुरवातीला नवाब मलिक यांनी आपण राष्ट्रवादीत असल्याचे सांगत मतदार संघातील मुद्दे सभागृहात मांडणार असून राजकीय मुद्द्यावर बोलणार नसल्याचे प्रसार माध्यमांशी बोलताना सांगितले.