यवतमाळ : एकेकाळी स्टेजवर थिरकणारी त्याची पावले आता आधाराविना उभीही राहू शकत नाहीत. नृत्यात निपुण असल्याने अगदी कमी वयात "डान्सर' हिरो ही ओळख मिळाली होती. मात्र नियतीला ते मंजुर नव्हते. आयुष्याची सोनेरी स्वप्ने बघत असतानाच काही वर्षांपूर्वी एव्हीएन या दुर्धर आजाराने त्याला ग्रासले. रंगमंचावर थिरकणाऱ्या पायाला कुबड्यांचा आधार घ्यावा लागत आहे. उपचारासाठी डॉक्‍टरांनी सहा लाखांचा खर्च सांगितला. वडील सुतार काम करीत कुटुंबाचा गाडा ओढतात. इतकी मोठी रक्कम आणायची कुठून, हा प्रश्‍न कुटुंबीयांना सतावतो आहे.

भूषण लक्ष्मण क्षीरसागर, असे एव्हीएन आजाराने ग्रासलेल्या तरुणाचे नाव आहे. यवतमाळ शहरातील अंबिकानगरात वास्तव्यास असलेल्या तरुणाचे वय अवघे २२ वर्षे आहे. एकेकाळी त्याचे पाय रंगमंचावर थिरकायची. डान्स क्‍लासेसच्या माध्यमातून त्याने कित्येक कलाकार घडविले आहेत. नृत्य स्पर्धेत भूषणने पारितोषिकांवर आपल्या नावाची मोहोर उमटविली आहे. काही वर्षांपूर्वी आजाराने पछाडले आणि नृत्यासह बीएचे शिक्षणही अर्ध्यांवरच सोडावे लागले.

भूषणचे नृत्य बघून रसिकांच्या तोंडातून कौतुकाचे उद्गार बाहेर पडायचे. ऐन उमेदीच्या काळात त्याला दुर्धर आजाराने पछाडले. कमरेखाली चेतना असली तरी चालता येत नाही. हा त्रास आणखीनच वाढत चालला आहे. आजवर नातेवाइक, मित्रमंडळी यांनी आपापल्या परीने मदत केली. आई-वडीलांनी पैसा जोडून दोन लाखापर्यंतचा खर्च केला. शासन स्तरावर कोणतीही मदत मिळू शकली नाही. त्याच्यावर दिल्ली येथेच उपचार होऊ शकतात. मात्र, सहा लाखांची रक्कम जमा करणे सुतारकाम करणाऱ्या वडिलांना अवघड जात आहे. परिणामी उपचाराअभावी दीड वर्षापासून तो घरांतच आहे.

सविस्तर वाचा - माजी ऊर्जामंत्र्यांचा सरकारवर थेट आरोप! वाचा नेमके काय म्हणाले

दानशुरांकडून मदतीची अपेक्षा
भूषण क्षीरसागर याच्या दोन्ही पायांवर शस्त्रक्रीया करावी लागणार आहे. त्याचा खर्च जवळपास सहा लाख रुपये आहे. दानशुरांनी मदतीचा हात पुढे केल्यास एक डान्सर पुन्हा आपल्या पायावर उभा होऊन जीवन जगू शकेल. मदतीसाठी भूषणच्या ८७६६४४७८१७ या क्रमांकावर संपर्क साधता येईल.

संपादन - स्वाती हुद्दार