नागपूर : आमदार-खासदार तसेच मंत्र्यांनी कुठेतरी मोक्याची जमीन विकत घेतल्याचं आपण नेहमी ऐकत असतो, मात्र याच मंत्र्यांनी स्वतःच्या मालकीची जमीन सामाजीक कार्यासाठी दान केल्याच क्वचितच ऐकायला मिळते. असाच काहीसा प्रकार राज्याचे अन्न व औषध प्रशासनमंत्री धर्मराव बाबा आत्राम यांच्याबाबत समोर आला आहे. आत्राम यांनी स्वतःच्या मालकीची २५० एकर जमीन एका प्रकल्पासाठी दान केली आहे.

आत्राम विदर्भातील मागसलेला आणि नक्षलग्रस्त भाग म्हणून ओळखल्या जाणाऱ्या गडचिरोली जिल्ह्यातील अहेरी विधानसभा मतदारसंघातील आमदार आहेत. आपल्या मतदारसंघातील तरुणांना रोजगार मिळावा या उद्देशाने मोठा प्रकल्प सुरू करण्यासाठी त्यांनी पुढाकार घेतला आहे.

गडचिरोली जिल्ह्यात सूरजागड येथे लोह खनिजाचा मोठा साठा असून खानीतून सध्या उत्खणन सुरू आहे. येथील लोह खनिजावर प्रक्रिया करण्यासाठी अहेरी येथे प्रकल्प सुरू करण्यात येणार आहे. त्यासाठी अडीचशे एकर जागा त्यांनी सुरजागड इस्पात या कंपनीला देण्याचा निर्णय घेतला आहे.

मिळालेल्या माहितीनुसार हा प्रकल्पा पाच हजार कोटी रुपयांचा आहे. तसेच या प्रकल्पामुळे सुमारे आठ ते दहा हजार नागरिकांना रोजगार उपलब्ध होणार आहे. या प्रकल्पाचे भूमिपूजन १७ ऑगस्टला राज्याचे उपमुख्यमंत्री अजित पवार, उपमुख्यमंत्री देवेंद्र फडणवीस, राज्याचे उद्योग मंत्री उदय सामंत यांच्या उपस्थितीत होणार आहे. चार टप्प्यात हा प्रकल्प विकसित केला जाणार असून वडलापेठ या परिसरात सूरजागड इस्पात प्राइवेट लिमिटेड कंपनी हा प्रकल्प विकसित करणार आहे.