साकोली (जि. भंडारा) - मित्राच्या लग्नावरून परत येताना भरधाव वेगातील झायलो कार दुभाजकावर चढून पुलाच्या पिल्लरवर आदळली व लोखंडी रेलिंग तोडत दुसऱ्या बाजूला पलटली. ही घटना गुरुवारी रात्री साडेअकरा वाजता येथील उड्डाणपुलाखाली नटराज बारसमोर घडली. या अपघातात दोघांचा मृत्यू झाला तर, तिघे गंभीर झाले आहेत. मृतांमध्ये संदीप श्रावण कुरसुंगे (वय २५) आणि सारंग मारूती कद्रेवार (वय २५) यांचा समावेश आहे.

येथील चालक विशाल वाघाडे हा त्याचा मित्र वैभव मानकर याच्या लग्नासाठी सोनका (पळसगाव) येथे काही मित्र व नातेवाईकांसाेबत झायलोने (क्रमांक एमएच ५०/ बीजी२६६०) गेला होता. लग्न आटोपून ही सर्व मंडळी साकोलीकडे परत आली. या वाहनामध्ये बसलेल्या महिलांना लाखांदूर मार्गावर सोडले.

त्यानंतर वाहनात बसणारे कुणाल हेमराज ठाकरे व सारंग मारुती कद्रेवार या दोघांनाही घरी सोडण्यासाठी सेंदूरवाफाकडे जात असताना भरधाव वेगातील वाहनावरील चालकाचे नियंत्रण सुटले. यामुळे नटराज बारसमोर हीझायलो दुभाजकावर चढून उड्डाणपुलाच्या पिल्लरवर आदळून उलटली. या अपघातात गाडीत बसलेल्या संदीप कुरसुंगे व सारंग कद्रेवार यांचा जागीच मृत्यू झाला. हे दोघे साकोली व सेंदूरवाफा येथील रहिवासी आहेत.

तसेच चालक विशाल वाघाडे (वय २५), कुणाल ठाकरे (वय १९) व प्रणय बैरागी (वय २४) हे तिघेही गंभीर जखमी झाले. जखमींना रात्री उपजिल्हा रुग्णालयात उपचारासाठी दाखल करण्यात आले. प्राथमिक उपचारानंतर त्यांना येथील आशीर्वाद नर्सिंग होम मध्ये हलविण्यात आले आहे. पोलिसांनी चालक विशाल वाघाडे याच्यावर वाहन कायदा अन्वये गुन्हा नोंदविला असून पोलिस निरीक्षक रमाकांत कोकाटे हे अधिक तपास करीत आहेत.