वडकी (यवतमाळ) : सराटी जंगलातील नरभक्षक वाघिणीला पकडण्यासाठी आणलेला हत्ती काल (ता. 2) पासून बेपत्ता होता. तो सैरवैर हत्ती जंगल क्षेत्र सोडून गावात पोहोचला. सराटीपासून जवळ असलेल्या चहांद या गावात हत्तीने धुमाकूळ घातला. पिसाळलेल्या हत्तीने अर्चना मोरेश्वर कळसंगे (वय 30) ही महिला बैलाचे शेण काढत असताना तिला हत्तीने आपटून ठार केले. गावकऱ्यांनी आरडाओरड केली असता पिसाळलेल्या अवस्थेतील हत्ती सैरावैरा पळाला. याच हत्तीने वर्धा जिळ्यातही धुमाकूळ घातला.

लगतच्या पोहना येथील नामदेव मुकींदा सवाई (वय 72) या व्यक्तीला जखमी केले आहे. या पिसाळलेल्या हत्तीमुळे परिसरातील जनता भयभीत झाली. हत्तीला वनविभागाने पकडल्याची माहिती मिळाली आहे. महिलेला ठार केल्यानंतरही वनविभागाच्या एकही कर्मचारी घटनास्थळी पोहोचले नव्हते. शेवटी वडकी येथील सहाय्यक पोलिस निरीक्षक दीपक कांग्रेडवार यांनी महिलेचा मृतदेह शवविच्छेदनासाठी राळेगाव येथे पाठविला.