राहुल गांधी हेच आमचे "स्टार प्रचारक'

भाजपचा टोला; निवडणुकांची चिंता कॉंग्रेसला

नवी दिल्ली: "गुजरातसह इतर राज्यांच्या निवडणुकांची चिंता भाजपला नसून ती कॉंग्रेसला आहे. त्यांच्या भावी अध्यक्षांच्या अमेरिका दौऱ्यात हीच चिंता प्रकट होत असली, तरी नरेंद्र मोदी-अमित शहा यांच्यानंतर राहुल गांधी हेच भाजपसाठी "स्टार प्रचारक' आहेत व असतील,' असा टोला भाजपने लगावला आहे. राहुल गांधी हे सध्या परदेशांत फिरून स्वतःच्या पक्षाचा प्रचार करत असून, यात भाजपला काहीही अडचण नाही, अशीही सत्तारूढ पक्षाची भूमिका आहे.

जगात 189 देश असून राहुल गांधी हे मोदी सरकारवर भाष्य करू लागल्यापासून फक्त दोनच देश फिरले आहेत, असा चिमटा काढून भाजपचे नेते राम माधव म्हणाले, की अद्याप ऑक्‍सफर्ड, हार्वर्डसह अनेक ठिकाणी राहुल गांधी यांचे ज्ञान ऐकायला मिळेल, अशी आशा आम्ही करू शकतो. मात्र, देशात विधानसभा निवडणुकीचे रणांगण तापत जात असताना राहुल गांधी परदेशांत जात आहेत, हेही लक्षणीय ठरावे.

भाजपच्याच एका "थिंक टॅंक' नेत्याने राहुल गांधी यांचे वर्णन "भाजपचे स्टार प्रचारक' असे केले. राहुल गांधी हे मोदींवर जेवढी टीका करतील तेवढा 2019 मधील मोदी यांच्या नेतृत्वाखाली भाजपचा विजय आलेख वाढेल, असे भाकीतही त्यांनी केले. मोदी सरकारने नोटाबंदीसारखे निर्णय घेतले. त्याचे काही तात्कालिक तोटे असतीलही; पण दूरगामी फायदे सध्याच्या त्रासाहून जास्त मोठे असतील व 2019 पर्यंत ते निश्‍चित दिसतील, असाही विश्‍वास या नेत्याने व्यक्त केला.