मुंबई - राष्ट्रीय पेन्शन योजनेला (एनपीएस) जास्तीत जास्त लोकांपर्यंत पोचण्यासाठी पेन्शन फंड नियामक आणि विकास महामंडळाने (पीएफआरडीए) "एनपीएस' खासगी क्षेत्रासाठी खुली केली आहे. राज्यात "पीएफआरडीए'कडून राज्यामध्ये "एनपीएस लाओ, अच्छे दिन पाओ' ही मोहीम राबवली जाणार आहे. या मोहिमेत "एनपीएस' स्वीकृती केंद्र वाढवली जाणार असून, खासगी बॅंका आणि वित्त सेवा संस्थांना एनपीएस वितरणासाठी भागीदार केले जाणार आहे.
नुकताच सरकारने "एनपीएस'ची वयोमर्यादा 60 वरून 65 केली होती. "एनपीएस'च्या खासगी क्षेत्रामधील वृद्धीसाठी "पीएफआरडीए'ने पॉइंट्स ऑफ प्रेझेन्स ही मोहीम हाती घेतली आहे. याअंतर्गत सार्वजनिक बॅंका, खासगी बॅंका आणि वित्तसेवा पुरवठादार कंपन्या "एनपीएस'चे वितरण करणार आहेत. नागरिकांना उतारवयातील आर्थिक गरजा भागविण्यासाठी निवृत्ती वेतनाच्या स्वरूपामध्ये प्रमाणित निवृत्ती उत्पन्न देणाऱ्या "एनपीएस'ची जनजागृती केली जाणार आहे. "एनपीएस लाओ, अच्छे दिन पाओ' ही मोहीम 20 ते 28 नोव्हेंबर दरम्यान राबवली जाणार आहे. किमान 500 रुपयांमध्ये एनपीएस खाते सुरू करता येईल. शिवाय eNPS च्या माध्यमातूनही नवे एनपीएस खाते सुरू करता येणार आहे.
|