पुणे शहरात २३ धोकादायक झाडे 

पुणे - शहरात वेगवेगळ्या भागात जवळपास २३ झाडे आणि त्यांच्या फांद्या वारा आणि पावसामुळे कोसळण्याची शक्‍यता आहे. यामुळे पादचारी आणि वाहनचालकांच्या जिवाला धोका निर्माण झाला आहे. याबाबत उपाययोजना करण्याकडे महापालिकेची यंत्रणा पूर्णपणे दुर्लक्ष करीत आहे. या कामाची जबाबदारी वृक्ष प्राधिकरण समितीची असल्याचे महापालिकेचा उद्यान विभाग आणि अग्निशमन दल यापासून लांब राहात आहे. त्यामुळे तक्रार कोणाकडे करायची, असा प्रश्‍न नागरिकांसमोर उभा राहिला आहे.  

शहरातील प्रमुख रस्त्यांसह लोकवस्तीतही धोकादायक झाडे आहेत. मात्र, प्रस्ताव आणि त्यावरील प्रशासकीय कार्यवाहीपुरतेच मर्यादित असलेले वृक्ष प्राधिकरण ही बाब गंभीर्याने घेत नसल्याचे स्पष्ट झाले आहे. नागरिकांच्या तक्रारी येऊनही प्राधिकरण निर्णय घेत नसल्याने पावसात झाडे कोसळण्याच्या घटना घडत आहेत. सहकारनगरमधील संतनगरसारख्या गजबजलेल्या भागात चार दिवसांपूर्वी झाड कोसळले. सुदैवाने यात जीवितहानी झाली नाही. 

या झाडाच्या फांद्या तोडल्या नसल्याने ते कोसळल्याचे रहिवाशांनी सांगितले. विशेष म्हणजे, येथील सत्ताधारी भाजपच्या नगरसेविक साईदिशा माने यांनी तक्रार केली होती, तरीही एकाही यंत्रणेने दखल घेतली नाही. जेव्हा झाड पडले तेव्हाही अग्निशमन दलाची यंत्रणा पोचली नसल्याने माने यांच्या कार्यकर्त्यांनीच झाड बाजूला केले.

वाहनांची जास्त वर्दळ असलेल्या रस्त्यांलगतच्या झाडांच्या फांद्या लोंबकळत असून, त्या मोठ्या प्रमाणात विस्तारल्याच्या तक्रारी आहेत. काही भागात तर फांद्यांच्या ओझ्याने झाडे कोसळण्याची भीती निर्माण झाली आहे. पावसाआधी झाडांच्या फांद्या कापण्याची कामे करण्यात येतील, असे संबंधित विभागांकडून सांगण्यात आले. परंतु, काही मोजक्‍याच ठिकाणी कामे केल्याचे दिसून आले आहे. तक्रार करूनही उपाययोजना केल्या जात नसल्याने धोकादायक झाडांमुळे दुर्घटना घडण्याची शक्‍यता निर्माण झाली आहे. 

रस्ते आणि नागरी वस्तीतील झाडांबाबतच्या तक्रारींची बैठकीत तातडीने चर्चा करून उपाययोजना करण्याच्या सूचना केल्या जातात. तसेच, खबरदारी म्हणून शहरात कामे करण्यात आली आहेत. ज्या भागातील नागरिकांच्या तक्रारी आहेत, त्या सोडविण्यात येतील.
- आदित्य माळवे, नगरसेवक व वृक्षप्राधिकरण समितीचे सदस्य