चिंचवडमधील गोठ्यामुळे दुर्गंधी (व्हिडिओ)

पिंपरी - महापालिकेच्याच चिंचवड येथील झोपडपट्टी निर्मूलन आणि पुनर्वसन विभागाच्या इमारतीलगतच बेकायदा गोठा सुरू आहे. जनावरांचे मलमूत्र पार्किंगमध्ये पसरत असल्यामुळे परिसरात दुर्गंधी पसरत आहे. पर्यायाने नागरिकांच्या आरोग्याचा प्रश्‍नही निर्माण झाला आहे.

शहराच्या मध्यवस्तीत गुराचा गोठा बांधण्यास कायद्याने बंदी आहे. चिंचवड येथील भाजी मंडईलगतच्या झोनिपु कार्यालयाच्या आवारात मागील बाजूस पोलिस ठाणेही आहे. तसेच खासगी रुग्णालयही आहे. झोनिपुच्या कार्यालयालगतच मोकळी जागा आहे. येथे एका व्यावसायिकाचा गोपालनाचा बेकायदा व्यवसाय सुरू आहे. येथे सुमारे १५ गुरे आहेत. या गुरांच्या मलमूत्राचे पाणी झोनिपुचे कार्यालय आणि पोलिस ठाणे असलेल्या इमारतीच्या पार्किंगमध्ये वाहत येते. या पार्किंगच्या जागेत पोलिसांनी जप्त केलेल्या दुचाकी ठेवल्या आहेत. तसेच, पोलिस कर्मचारी, झोनिपुच्या कार्यालयातील कर्मचारी, या दोन्ही ठिकाणी येणारे नागरिकही या पार्किंगचा वापर करतात. परंतु तेथे गुरांच्या मलमूत्रामुळे या सर्वांनाच दुर्गंधीचा सामना करावा लागत आहे. त्यामुळे नागरिकांचे आरोग्य धोक्‍यात आले आहे. या पार्किंगमध्ये मलमूत्रामुळे दलदल निर्माण झाली आहे.  या इमारतीलगत छोट्या खोलीत विद्युतरोहित्र आहे. त्यालगतच गोवऱ्याही ठेवण्यात येत आहेत. 

चिंचवड ठाण्याचे पोलिस निरीक्षक प्रभाकर शिंदे म्हणाले, की या जागेबाबत गोठा व्यावसायिक आणि महापालिका यांच्यात काही वाद असल्याचे समजले आहे. गोठा बेकायदा असल्यास संबंधित व्यावसायिकाला नोटीस देतो.

दोन महिन्यांपासून महापालिकेच्या अधिकाऱ्यांना गोठा व्यावसायिकाविरुद्ध कारवाई करण्यास सांगितली. परंतु कारवाई झाली नाही. गायीच्या शेणामुळे धुनर्वाताचे जंतू इतरत्र पसरून नागरिकांच्या, रुग्णांच्या आरोग्याला धोका पोचू शकतो. 
- डॉ. दिलीप कामत, वैद्यकीय व्यावसायिक

संबंधित गोठा व्यावसायिकावर कारवाई करण्यास भूमी आणि जिंदगी विभागाला सांगितले आहे. अतिक्रमण विभागालाही कारवाई करण्याबाबत कळवितो. 
- दिलीप गावडे, अतिरिक्त आयुक्त, महापालिका

कायद्यानुसार शहराच्या मध्यवस्तीमध्ये गुरांचा गोठा सुरू करता येत नाही. 
- मनोज लोणकर, सहायक आयुक्त (आरोग्य) महापालिका

गुरांच्या गोठ्याला पालिका परवानगी देत नाही. राज्याचा पशुसंवर्धन विभाग देतो. गोठ्यातील अस्वच्छतेमुळे माणसाला कोणते आजार होऊ शकतात, हे आरोग्य विभागाचे अधिकारी सांगू शकतील. 
- डॉ. अरुण दगडे, पशुवैद्यकीय अधिकारी, महापालिका