पालिकेपुढे ‘टॉप टेन’चे आव्हान

पिंपरी -  स्वच्छ भारत अभियानाचे दोन ऑक्‍टोबरपासून चौथे वर्ष सुरू होत आहे. पहिल्या वर्षी देशात पहिल्या दहा शहरांत स्थान पटकाविलेले पिंपरी-चिंचवड थेट ७२व्या स्थानावर फेकले गेले. त्यात थोडी फार सुधारणा केलेल्या शहराला तिसऱ्या म्हणजे चालू वर्षी ४३ व्या क्रमांकावर समाधान मानावे लागले. आगामी २०१८-२०१९ या वर्षात पहिल्या दहामध्ये स्थान मिळविण्याचे आव्हान शहरासमोर आहे. त्या पार्श्‍वभूमीवर महापालिकेची धडपड सुरू आहे. 

स्वच्छ भारत अभियानात पहिल्याच वर्षी शहराचा समावेश झाला होता. मात्र त्यानंतर सलग दोन वर्षे ‘टॉप टेन’ने शहराला हुलकावणी दिली. आता २०१९ साठी स्वच्छ सर्वेक्षण मोहीम जाहीर केली आहे. 

पहिल्या दहामध्ये क्रमांक येण्यासाठी शहरातील शंभर टक्के कचऱ्यावर प्रक्रिया करण्यासाठी महापालिकेची धडपड सुरू आहे. त्यासाठी निविदाप्रक्रिया अंतिम टप्प्यात आली आहे. त्यासाठी अधिकारी, कर्मचाऱ्यांसाठी कार्यशाळा घेण्यात आली. हागणदारीमुक्तीसाठी सुमारे ८० टक्के वैयक्तिक शौचालये उभारली आहेत.

नागरिकांनी घरातील कचऱ्याचे वर्गीकरण किंवा विलगीकरण स्वतःच करावे. आरोग्यविषयक तक्रारी करण्यासाठी स्वच्छ भारत ॲप डाउनलोड करून घ्यावे. तसेच, स्वच्छ भारत मंच केंद्र सरकारने सुरू केला आहे. त्यावरही नागरिक स्वच्छतेबाबत मत व्यक्त करून शकतात. सूचना व संकल्पना मांडू शकतात.
- दिलीप गावडे, अतिरिक्त आयुक्त, महापालिका