प्लॅस्टीक बंदीमुळे भाजीमंडईत रद्दी पेपरला मागणी

जुनी सांगवी (पुणेे) : महाराष्ट्र सरकारने नुकताच प्लॅस्टीक बंदी कायदा लागु केल्याने याची सांगवी परिसरात बहुतांश ठिकाणी याची अंमलबजावणी होताना दिसत आहे. सांगवी व परिसरात लोकप्रतिनिधी व सामाजिक कार्यकर्त्यांकडुन जनजागृती करण्यात येत आहे. येथील भाजी मंडई व बाजारपेठेत याचा परिणाम पहावयास मिळत आहे.

भाजी व्यावसायीकांनी याबाबत प्लॅस्टीक बंदीमुळे कॅरीबॅग बंद असल्याचे फलक हातगाड्यांवर लावले आहेत. मात्र अजुनही अनेकजण कॅरीबॅग हा सवयीचा भाग झाल्याने कापडी पिशवी सोबत न घेताच भाजी खरेदीसाठी थेट येतात. अशा ग्राहकांसाठी जुनी सांगवीत भाजी विक्रेत्यांनी पेपर रद्दी ठेवण्यास सुरूवात केली आहे. तर बाजारपेठेतील मिठाईची दुकाने, फळविक्रेत्यांनी काही महिला बचत गटांकडुन स्वताच्या नावाच्या कागदी पिशव्या तयार करण्यास ऑर्डर दिल्याचे समजते. अनेक नागरीक नेहमीच्या सवयीप्रमाणे भाजी खरेदीसाठी बाजारात येतात मात्र बाजारात पोचल्यावर प्लॅस्टीक बंदी असल्याचे लक्षात येते. परत घरी जाऊन पिशवी आणण्यापेक्षा असे नागरिक भाजी विक्रेत्यांना तुच काहीतरी व्यवस्था कर असे सांगतात त्यामुळे येथील बहुतांश भाजी विक्रेत्यांनी रद्दी पेपर ठेवले आहेत. "अशा पिशवी विसरून आलेल्या ग्राहकांना आम्ही पर्यायी पेपर रद्दीतुन भाजी देतो. कापडी पिशवी परवडत नसल्याने पेपर रद्दीचा मार्ग सोपा वाटतो.",असे भाजी विक्रेते पांडुरंग पवार यांनी सकाळशी बोलताना सांगीतले. 

"बाजारपेठेतील गरज लक्षात घेवुन गरजु महिलांकडुन कागदी पिशव्या तयार करण्याचे काम सुरू करायचे आहे. यामुळे महिला बचत गटांना काम मिळेल, असे सावित्रीबाई फुले महिला बचत गटच्या अध्यक्षा सुजाता निकाळजे यांनी सांगितले. 

मिठाई  पॅकींगसाठी जाड कागदी पिशव्यांचा वापर सुरू केला आहे. कॅरीबॅग मागु नये असे सुचना फलक दुकानात लावण्यात आले आहेत, असे मिठाई विक्रेत्याने सांगितले.