खऱ्या ओबीसींवर भाजपकडून अन्याय 

पिंपरी (पुणे) - महापालिका निवडणुकीत ओबीसींनी भाजपला भरभरून मतदान केले. मात्र आता पदांचे वाटप करताना खऱ्या ओबीसींवर अन्याय केला जात असून कुणबी जात प्रमाणपत्रावर निवडून आलेल्यांना संधी दिली जात असल्याचा आरोप बारा बलुतेदार महासंघ आणि पिंपरी चिंचवड ओबीसी संघर्ष समितीने केला आहे. 

बारा बलुतेदार महासंघ आणि पिंपरी चिंचवड ओबीसी संघर्ष समिती यांच्यावतीने पिंपरीत पत्रकार परिषदेचे आयोजन केले होते. त्यावेळी प्रताप गुरव, प्रदीप पवार, विशाल जाधव, आनंदा कुदळे यांच्यासह अनेकजण उपस्थित होते. 

कुणबी जात प्रमाणपत्रावर निवडून आलेल्या महापौर नितीन काळजे यांच्या विरोधात घनश्‍याम खेडकर यांनी न्यायालयात आव्हान दिले आहे. तर दुसरीकडे महापौर पदाच्या शर्यतीतील उमेदवार शत्रुघ्न काटे यांच्याही निवडीला कैलास कुंजीर यांनी आव्हान दिले आहे. त्याचे जात प्रमाणपत्र खोटे असल्याचे त्यांच्या विरोधकांचे म्हणणे आहे. महापौर पदाचे आरक्षण हे इतर मागासवर्गीयांसाठी राखीव आहे. यामुळे हे पद मूळ ओबीसी असलेल्या नगरसेवकांनाच देण्यात यावे, अशी मागणी यावेळी करण्यात आली. जर खऱ्या ओबीसींवर अन्याय केल्यास आगामी निवडणुकीत ओबीसी समाज भाजपला घरी बसविल्याशिवाय राहणार नाही, असा इशाराही या पत्रकार परिषदेत देण्यात आला.