महापालिकेच्या सेमी इंग्रजीचा फज्जा

आशा साळवी
मंगळवार, 22 मे 2018

पिंपरी - महापालिका शाळांमधील पटसंख्या टिकविण्यासाठी पाच वर्षांपूर्वी ८० शाळांमध्ये ‘सेमी इंग्रजी’चे वर्ग सुरू करण्यात आले; परंतु केवळ अन्‌ केवळ शिक्षकांच्या उदासीनतेमुळे त्यातील ३९ वर्ग बंद पडले आहेत. 

पिंपरी - महापालिका शाळांमधील पटसंख्या टिकविण्यासाठी पाच वर्षांपूर्वी ८० शाळांमध्ये ‘सेमी इंग्रजी’चे वर्ग सुरू करण्यात आले; परंतु केवळ अन्‌ केवळ शिक्षकांच्या उदासीनतेमुळे त्यातील ३९ वर्ग बंद पडले आहेत. 

गेल्या काही वर्षांत पालकांचा मुलांना इंग्रजी शाळेत पाठविण्याचा कल वाढल्याने महापालिकेच्या मराठी शाळांची पटसंख्या घटू लागली. त्यावर उपाययोजना करताना शिक्षण मंडळाचे तत्कालीन प्रशासन अधिकारी हरी भारती यांनी २००८ मध्ये महापालिकेच्या ९० शाळांमध्ये ‘पाचवीपासून सेमी इंग्रजीचे वर्ग’ सुरू केले. त्यानंतर माजी सभापती फजल शेख यांनी २०१२ मध्ये ८० शाळांमध्ये पहिली ते सातवी सेमी इंग्रजीचे वर्ग सुरू केले. आजच्या घडीला त्यातील ४१ शाळांमध्ये काहीच वर्गांना सेमी इंग्रजीतून शिकवले जात आहे. 

जाधववाडी कन्या व मुले या दोन प्राथमिक शाळेत पहिली ते सातवीच्या विद्यार्थ्यांना सेमी इंग्रजीतून शिक्षण दिले जाते, तर सात शाळांमध्ये फक्त पहिली व दुसरीचे वर्ग सेमी भरतात. खिंवसरा पाटील शाळेत सहावी वर्ग तर वाकड शाळा क्रमांक ५७/१ मध्ये इयत्ता दुसरीच्या मुलांना सेमी इंग्रजीतून शिकवण्यात येते. कस्पटेवस्ती शाळा क्रमांक ५९ मध्ये ३५ मुलांचा पहिलीचा वर्ग सेमीमधून भरतो. भूमकरवस्ती कन्या व यशवंतनगर शाळेत दुसरीचा, खराळवाडी शाळेत पाचवी व सहावीचा वर्ग सेमीतून भरतो. शिक्षण मंडळाचे ढिसाळ नियोजन आणि उदासीन शिक्षक यामुळे वारंवार सेमी इंग्रजीचा फज्जा उडत आहे.

सेमी इंग्रजी वर्गासाठी लाखो रुपये खर्च करून शिक्षकांना प्रशिक्षण दिले जाते. शिक्षकांना सेमी इंग्रजीतून गणित, विज्ञान हे विषय शिकविण्याच्या सूचना केल्या आहेत. मात्र, शिक्षकांच्या अनास्थेमुळे ही परिस्थिती ओढवली आहे.
- बी. एस. आवारी, प्रशासन अधिकारी, शिक्षण विभाग

सेमी इंग्रजीच्या शाळा
 जाधववाडी कन्या व मुले
 खिंवसरा पाटील
 वाकड शाळा क्रमांक ५७/१
 कस्पटेवस्ती शाळा क्रमांक ५९
 भूमकरवस्ती कन्या 
 यशवंतनगर
 खराळवाडी

Web Title: Municipal Semi English issue