चार महिन्यांत केवळ सल्लागारच 

पिंपरी - स्मार्ट सिटी योजनेतून नवी मुंबई महापालिका बाहेर पडल्यानंतर पिंपरी-चिंचवड महापालिकेचा वर्षभरापूर्वी समावेश झाला; मात्र अंतिम फेरीत पात्र होऊन समावेशाची अधिकृत घोषणा जून 2017 मध्ये झाली. गेल्या चार महिन्यांमध्ये फक्त प्रकल्प व्यवस्थापन सल्लागार नेमण्यासाठी कार्यवाही झाली आहे. अद्याप प्रकल्पासाठी केंद्र आणि राज्य सरकारकडून निधीची प्रतीक्षा आहे. 

पुढील दोन महिन्यांमध्ये पॅन सिटी आणि मॉडेल वॉर्डचे सर्वेक्षण करण्याचे महापालिकेचे नियोजन आहे. त्याशिवाय या प्रकल्पाचा विस्तृत प्रकल्प अहवाल तयार करावा लागणार आहे. प्रकल्पाच्या पहिल्या टप्प्यात नागरिकांसाठी उपयुक्त सुविधा करण्यावर भर असणार आहे. हा प्रकल्प एकूण एक हजार 149 कोटी रुपयांचा असेल. या प्रकल्पांतर्गत महापालिकेला पुढील चार वर्षांमध्ये केंद्र व राज्य सरकारकडून निधी मिळणार आहे. 

आज बैठक 
स्मार्ट सिटीसाठी स्थापन झालेल्या एसपीव्ही कंपनी संचालक मंडळाची दुसरी बैठक शुक्रवारी (ता. 10) सकाळी 11 वाजता होणार आहे. महापालिका आयुक्त श्रावण हर्डीकर यांच्या दालनात ही बैठक होईल. नगरविकास खात्याचे प्रधान सचिव डॉ. नितीन करीर हे अध्यक्षस्थानी असतील. बैठकीत पॅन सिटी कॉम्पोनंट प्रकल्पाचा आढावा, स्मार्ट सिटीसाठी नियुक्त करावयाच्या प्रकल्प व्यवस्थापन सल्लागाराबाबत चर्चा होईल. त्याशिवाय, कंपनीसाठी कॅगचे लेखापरीक्षक नियुक्त करण्याचा प्रस्ताव आहे. शहराचे वाहतूक नियोजन, स्मार्ट रस्ते, नगर नियोजन, टोपोग्राफी सर्वेक्षण आदी मुद्यांबाबत बैठकीत विस्तृत चर्चा अपेक्षित आहे. 

स्मार्ट सिटी योजनेचे नेमके स्वरूप 
* स्मार्ट सिटी प्रस्तावात प्रामुख्याने क्षेत्रनिहाय विकास (एरियाबेस डेव्हलपमेंट) आणि 
पॅन सिटी हे दोन प्रमुख घटक 
* एकूण 1149 कोटी रुपयांच्या प्रकल्पाचा समावेश 
* क्षेत्रनिहाय विकासासाठी 593 कोटी 67 लाख इतका खर्च अपेक्षित 
* पॅन सिटीअंतर्गत 555 कोटी 53 लाख इतक्‍या खर्चाचे नियोजन 
* अभियानाचे मुख्य घटक : रेट्रोफिटिंग, पुनर्विकास, हरित क्षेत्र विकास (ग्रीन फिल्ड डेव्हलपमेंट)