पिंपरी - शहरातील अंतर्गत मार्गांवर लवकरच पीएमपीच्या नवीन मिडी गाड्या धावणार आहेत. त्यामुळे प्रवाशांना चांगली सुविधा मिळणार आहे. या गाड्या आकाराने लहान असल्याने त्या मोठ्या गाड्यांच्या तुलनेत जास्त लवकर प्रवाशांची वाहतूक करू शकतील. डिसेंबरच्या अखेरीला किंवा नववर्षाच्या प्रारंभी या गाड्यांची सेवा शहरास उपलब्ध होईल.
पिंपरी-चिंचवडमधील दोन बसमार्गांवर बीआरटी बससेवा असून, जानेवारीत निगडी-दापोडी मार्गावर; तर जूनमध्ये काळेवाडी ते देहू आळंदी रस्ता या मार्गावर बीआरटी सुरू होईल. बीआरटी बससेवेला जाण्यासाठी शहराच्या विविध भागांतून मिडी गाड्यांतून प्रवाशांना जलद जाता येईल.
पीएमपीतर्फे दोनशे मिडी गाड्या खरेदी करण्यात येणार आहेत. त्यापैकी साठ गाड्या पहिल्या टप्प्यात मिळणार आहेत. त्यापैकी चाळीस गाड्या पुणे शहराला आणि वीस गाड्या पिंपरी-चिंचवड महापालिकेला मिळतील. शहरांतर्गत ज्या रस्त्यांवर वाहतुकीची जास्त गर्दी आहे; तसेच रस्ते अरुंद आहेत. अशा ठिकाणी मिडी गाड्या उपयुक्त ठरतील.
पीएमपीचे अध्यक्ष व व्यवस्थापकीय संचालक तुकाराम मुंढे या संदर्भात "सकाळ'ला माहिती देताना म्हणाले, 'काही मिडी गाड्या आल्या होत्या. त्यामध्ये बसविलेली आयटीएमएसची सुविधा अपेक्षेप्रमाणे नव्हती. त्यात काही त्रुटी होत्या. त्या दुरुस्त करून देण्यास संबंधित कंपनीला सांगितले आहे. त्या गाड्या मिळाल्यानंतर त्या मार्गांवर पाठविण्यात येतील. डिसेंबरमध्ये त्या गाड्या मिळतील, अशी अपेक्षा आहे.''
पिंपरी-चिंचवड शहरात अंतर्गत मार्गांवर पुरेशी बससेवा उपलब्ध नसल्याची तक्रार आहे. त्यापैकी तीन मार्गांवर बससेवा सुरू केली. नववर्षात शहरवासीयांची ती तक्रार दूर करण्यात येईल. त्यांच्यासाठी मिडी गाड्या उपलब्ध करून दिल्या जातील. अरुंद रस्ते आणि गर्दीच्या मार्गांवर त्या धावतील. काही नवीन मार्गही सुरू करण्यात येतील. त्यामुळे प्रवाशांच्या अडचणी दूर होतील.
- तुकाराम मुंढे, अध्यक्ष व व्यवस्थापकीय संचालक, पीएमपी.
|