#PuneTraffic बेशिस्त वाहनचालकांना पोलिसांचा चाप

पुणे - वाहतुकीच्या नियमांचे सर्रास उल्लंघन करणाऱ्या वाहनचालकांना शिस्त लागावी, यासाठी वाहतूक शाखेने कंबर कसली असून; गेल्या आठ महिन्यांत एकूण एक हजार ८६२ बेदरकार वाहनचालकांचे परवाने पोलिसांनी जप्त केले आहेत, तर २७९ जणांचे पासपोर्ट पोलिसांनी रोखले आहेत. याबरोबरच विरुद्ध दिशेने (नो एन्ट्री) येणाऱ्या वाहनचालकाविरुद्ध गुन्हा दाखल करून चार तासांतच या गुन्ह्यातील पहिले दोषारोपपत्र वाहतूक शाखेच्या दत्तवाडी पोलिसांनी दाखल केले आहे.  

शहरातील रस्त्यांवरील अपघातामध्ये मृत्युमुखी पडणाऱ्या नागरिकांची संख्या वाढली आहे. याची गांभीर्याने दखल घेऊन वाहतूक शाखेच्या पोलिस उपायुक्त तेजस्वी सातपुते यांनी वाहतुकीच्या नियमांचे उल्लंघन करणाऱ्यांविरुद्ध ठोस कारवाई सुरू केली. त्यानुसार एक जानेवारीपासून वाहतूक पोलिसांनी अशा बेशिस्त वाहनचालकांचे परवाने जप्त करण्यास सुरवात केली. या कारवाईत मद्यपान करून वाहन चालविणाऱ्यांची संख्या लक्षणीय आहे. वाहतूक शाखेचे नियोजन विभागाचे पोलिस निरीक्षक अनिल पाटील म्हणाले, ‘‘वाहनचालकांनी वाहतुकीचे नियम पाळावेत. यासाठी वाहतूक पोलिसांकडून जागृती केली जात आहे. तरीही सर्रास नियम मोडणाऱ्या वाहनचालकांविरुद्ध ठोस पावले उचलली आहेत.’’ 

बेशिस्त वाहनचालकांविरुद्ध वाहतूक पोलिसांनी कडक कारवाई सुरू केली आहे. वाहतुकीचे नियम मोडणाऱ्या २७९ जणांचे पासपोर्ट पोलिसांनी रोखले आहेत. त्यामुळे वाहनचालकांना नियमांच्या पालनाशिवाय पर्याय नाही.
- अशोक मोराळे, पोलिस उपायुक्त, विशेष शाखा