अहमदनगर जिल्ह्यात विधानसभा लढविण्यासाठी राष्ट्रवादीकडून २१ इच्छुक, फाळकेंची माहिती; पुण्यात सोमवारी मुलाखती

अहमदनगर : राष्ट्रवादी काँग्रेस शरदचंद्र पवार पक्षाकडून जिल्ह्यात विधानसभा निवडणूक लढविण्यासाठी इच्छुकांची यादी दिवसेंदिवस वाढते आहे. आतापर्यंत २२ जणांनी अधिकृतपणे इच्छा व्यक्त केली आहे. विशेष म्हणजे यात आघाडीतील मित्रपक्षासोबतच भाजपमधील नेत्यांचाही समावेश आहे, अशी माहिती जिल्हाध्यक्ष राजेंद्र फाळके यांनी पत्रकार परिषदेत दिली.

पक्षातील उभ्या फुटीनंतर राष्ट्रवादीची ताकद विखुरली जाईल, असा विरोधकांचा कयास होता. परंतु राष्ट्रवादीला (पवार गट) जिल्ह्यात प्रचंड प्रतिसाद मिळतो आहे. लोकसभा निवडणुकीत ते मतदारांनी स्पष्ट केले आहे. इच्छुकांच्या सोमवारी मुलाखती होणार आहेत, असे जिल्हाध्यक्ष फाळके यांनी सांगितले.

जिल्ह्यात बारा मतदारसंघ आहेत. त्यातील आठ जागांवर राष्ट्रवादीचा दावा आहे. कर्जत-जामखेड, राहुरी, श्रीगोंदे, पाथर्डी, नगर शहर, अकोले, कोपरगाव, पारनेर आदी मतदारांचा त्यात समावेश आहे. संगमनेर, श्रीरामपूरमधून एकाही इच्छुकांचा अर्ज आला नाही. सर्वच ठिकाणी तुल्यबळ उमेदवार दिले जातील. जागावाटपाबाबत दोन दिवसांत चित्र स्पष्ट होईल. एखाद-दुसऱ्या जागेची अदलाबदल होण्याची शक्यताही फाळके यांनी व्यक्त केली.

मतदारसंघनिहाय इच्छुक

• अकोले - अमित भांगरे, मधुकर तळपाडे

• कोपरगाव - दिलीप लासुरे, संदीप वर्पे

• शिर्डी - रणजित बोठे, ॲड. नारायण कार्ले

• नेवासे - डॉ. वैभव शेटे

• शेवगाव-पाथर्डी - प्रताप ढाकणे, विद्या गाडेकर

• राहुरी - आमदार प्राजक्त तनपुरे.

• पारनेर - राणी लंके, रोहिदास कर्डिले, माधवराव लामखडे

• नगर शहर - डॉ. अनिल आठरे, शौकत तांबोळी, अभिषेक कळमकर

• श्रीगोंदे - बाबासाहेब भोस, राहुल जगताप, श्रीनिवास नाईक, अण्णासाहेब शेलार.

• कर्जत-जामखेड- आमदार रोहित पवार.