‘मुळा’ची वाटचाल ओव्हर-फ्लोकडे

राहुरी - मुळा धरण आज शनिवारी (ता. १३) सायंकाळी सहा वाजता ८८.३३ टक्के भरले. धरणाची वाटचाल ९० टक्‍क्यांकडे सुरू असून, विसर्ग सोडण्यासाठी प्रशासनाने तयारी केली आहे. सध्या ९ हजार ५४१ क्यूसेकने पाण्याची आवक सुरू आहे. भंडारदरा धरण पूर्ण क्षमतेने भरलेले असून, लाभक्षेत्रात विसर्ग सुरू आहे.

मुळा धरणात पाणीसाठा २२ हजार ९६७ दशलक्ष घनफूट (क्षमता २६ हजार) झाला आहे. लहीत खुर्द (कोतुळ) येथे मुळा नदीपात्रातून ९,५४१ क्यूसेकने धरणात नवीन पाण्याची आवक सुरू आहे. त्यामुळे, १५ ऑगस्ट रोजी धरणाचे दरवाजे उघडून नदीपात्रात पाणी सोडण्यासाठी हालचाली सुरू झाल्या आहेत. १६ ऑगस्ट रोजी पाणीसाठा २५ हजार ५०० दशलक्ष घनफूट स्थिर ठेवून नव्याने जमा होणारे पाणी धरणातून नदीपात्रात सोडले जाणार आहे. धरण परिचालन सूचीनुसार १५ सप्टेंबर ते १ ऑक्टोबर दरम्यान धरण पूर्ण क्षमतेने २६ हजार दशलक्ष घनफूट भरले जाते. यंदा सलग चौथ्या वर्षी धरण पूर्ण क्षमतेने भरणार आहे.

भंडारदरा परिसरात पर्यटकांची गर्दी

अकोले : भंडारदरा धरणाच्या पाणलोट क्षेत्रात पावसाचा जोर कायम असून, घाटघर येथे २०५ मिलिमीटर म्हणजे आठ इंच पाऊस झाल्याने जलाशयात पाण्याची आवक वेगाने वाढत आहे. शनिवारी सायंकाळी सहा वाजता जलाशयात १० हजार ६६७ दशलक्ष घनफूट साठा होता. धरणातून चार हजार ७२६ क्यूसेकने विसर्ग सुरू असून, अंब्रेला फॉल पाहण्यासाठी पर्यटकांची गर्दी होत आहे. वाकी जलाशयातून ७९० क्यूसेकने विसर्ग सुरू असल्याने रंधा धबधबा परिसर जलमय झाला आहे. शनिवारी-रविवारी सुटी असल्याने पर्यटकांनी या परिसरात मोठी गर्दी केली आहे. राजूर पोलिसांनी एकेरी वाहतूक सुरू करून गर्दीचे नियोजन केले आहे. मोठ्या प्रमाणात वारा व पाऊस असल्याने जनजीवन विस्कळित झाले आहे.

मुळा धरणाच्या पाणलोट क्षेत्रात जोरदार पाऊस सुरू आहे. धरणात नवीन पाण्याची आवक वाढत आहे. उद्या रविवारी (ता. १४) सायंकाळी सहा वाजेपर्यंत एक हजार दशलक्ष घनफुटांनी धरण साठा वाढण्याची शक्यता आहे. त्यामुळे सोमवारी (ता. १५) धरणाचे दरवाजे उघडून नदीपात्रात पाणी सोडण्याचा निर्णय घेतला जाईल.

- सायली पाटील, कार्यकारी अभियंता, मुळा पाटबंधारे विभाग.