लॉकडाउन शिथिल होताच नगरकरांमागे लागली कराची कटकट

अहमदनगर ः कोरोनाबाधितांची संख्या कमी होऊन लॉकडाउन संपताच महापालिकेच्या वसुली विभागाला आता मालमत्ताकराच्या वसुलीचे वेध लागले आहेत. त्यादृष्टीने महापालिकेच्या वसुली विभागाने तयारी सुरू केली आहे. सध्या मालमत्ताकराची बिले तयार करण्याची प्रक्रिया वेगात सुरू असून, लवकरच नागरिकांना बिलांचे वाटप केले जाणार आहे.

मालमत्ता करदात्यांना प्रोत्साहन म्हणून महापालिकेनेही जून महिन्यात करात दहा टक्के सूट जाहीर केली आहे. शहरातील कोरोनाबाधितांची संख्या वाढू लागल्यामुळे महापालिका प्रशासनाने सर्व लक्ष कोरोना निर्मूलनावर केंद्रित केले होते. त्यासाठी महापालिका आयुक्त शंकर गोरे यांनी चार दक्षता पथके तयार केली होती. (Ahmednagar Municipal Corporation started tax collection)

या पथकांच्या माध्यमातून शहरातील सोशल डिस्टन्सचे पालन न करणाऱ्या नागरिकांवर कारवाई करण्यात येत होती. शिवाय, इतरही कामांसाठी वेगवेगळी पथके तयार करण्यात आली होती. यात सर्वच विभागांचे कर्मचारी व अधिकारी तैनात करण्यात आले होते. प्रामुख्याने वसुली विभागाचा समावेश होता. वसुली विभागाचे काम यामुळे अतिशय संथ गतीने सुरू होते. राज्य सरकार व जिल्हा प्रशासनाकडून शहरातील लॉकडाउन उठवताच महापालिकेतील सर्व कर्मचारी आज कार्यालयात हजर होते.

महापालिकेच्या वसुली विभागाला त्यांचे कर्मचारी पुन्हा मिळताच आजपासून मालमत्ताकराची बिले तयार करण्याचे काम वेगाने सुरू होते. लवकरच नागरिकांना बिले घरपोच दिली जाणार आहेत. शहरात एक लाख १७ हजार मालमत्ता करदाते आहेत. त्यांची बिले तयार करण्याची प्रक्रिया आता अंतिम टप्प्यात आली आहे.

महापालिकेने एप्रिल व मे महिन्यांत मालमत्ताकर भरणाऱ्यांना करामध्ये दहा टक्के सूट दिली होती. मात्र, या दोन महिन्यांत शहरात लॉकडाउन असल्याने अनेकांना या सवलतीचा लाभ घेता आला नाही. त्यामुळे महापालिकेने जूनअखेरपर्यंत मालमत्ताकरावर दहा टक्के सूट दिली आहे. जुलै व ऑगस्ट महिन्यात मालमत्ताकरावर आठ टक्के सूट दिली जाणार आहे. त्यानंतर मात्र कोणतीही सूट न देता महापालिका वसुलीची जोरदार मोहीम हाती घेणार आहे.

मालमत्ताकर ऑनलाइनही भरता येणार
महापालिकेतील वसुली विभागात होणाऱ्या गर्दीपासून दूर राहून मालमत्ताकरावरील दहा टक्के सवलतीचा फायदा घेणेही आता सहज शक्य आहे. यासाठी महापालिकेने नागरिकांना मालमत्ताकर भरण्याची ऑनलाइन सुविधा उपलब्ध करून दिली आहे. त्यानुसार, महापालिकेचे संकेतस्थळ किंवा ॲपद्वारे मालमत्ताकर ऑनलाइन भरता येणार आहे.(Ahmednagar Municipal Corporation started tax collection)