अहमदनगर : गावरान गायीच्या गोवऱ्यांना नगरकरांची पसंती

अहमदनगर: होळीसाठी आवश्यक असणाऱ्या गोवऱ्यांना नगर शहरात चांगली मागणी आहे. विशेषतः देशी गावरान गायीच्या शेणापासून बनविलेल्या गोवऱ्या खरेदी करण्यास नागरिक पसंती देत आहेत. शहर व परिसरातील गोशाळांनी याबाबत सोशल मीडियाच्या माध्यमातून ‘मार्केटिंग’ केले आहे. घरपोच गोवऱ्या देण्याची व्यवस्थाही काही गोशाळांनी केली आहे.

होळीचा सण हा भारतीय संस्कृतीतील महत्त्वाचा उत्सव. प्रथेप्रमाणे फाल्गुन पौर्णिमेच्या दिवशी हा सण देशभरात साजरा केला जातो. उद्या (ता. १६) हा उत्सव साजरा होत आहे. या सणाला होळी, होळी पौर्णिमा, होलिकोत्सव अशी विविध नावे आहेत. उत्तर प्रदेशात हा सण अतिउत्साहाने साजरा होतो. महाराष्ट्रातही होळी सणाची सर्वांना ओढ असते. या दिवशी प्रत्येक घरासमोर गोवऱ्या, लाकडांची होळी पेटविली जाते. होळीची पूजा करून नेवैद्य दाखविला जातो. या सणासाठी गोवऱ्यांना चांगली मागणी असते. ग्रामीण भागात घरोघरी गोवऱ्या असतात, तथापि, शहरात त्या विकत घ्याव्या लागतात. आज शहरातील मुख्य बाजारपेठेत गोवऱ्यांचे ढीग दिसून आले. २५ ते ५० रुपयांना ५ गोवऱ्या, असे दर होते. ग्राहकांकडून, गायींच्या शेणापासून बनविलेल्या गोवऱ्या आहेत का, अशी विचारणा झाल्यानंतर, बहुतेक विक्रेत्यांनी तसे मार्केटिंग करीत विक्री केली.

गोशाळा सरसावल्या गेल्या आठवड्यापासून जिल्ह्यातील गोशाळांनी गायीच्या शेणापासून गोवऱ्या बनविल्या. त्या होलसेल दराने विकल्या.