अहमदनगर : घोसपुरीत दोन गटांत तुफान हाणामारी

अहमदनगर: घोसपुरी (ता. नगर) येथे सोमवारी (ता. नऊ)दुपारी तुफान हाणामारी झाली. एकमेकांच्या घरांवर दगडफेक करण्यात आली. याप्रकरणी नगर तालुका पोलिस ठाण्यात परस्परविरोधी फिर्यादी देण्यात आल्या. या हाणामारीत एका लष्करी जवानाचा समावेश असून, पोलिसांनी चार जणांना अटक केली आहे.

घोसपुरी येथे कव्हाणे व शेख या दोन कुटुंबांमध्ये सोमवारी (ता. नऊ) दुपारी साडेतीनच्या सुमारास धुमश्चक्री उडाली. यावेळी दोन्ही गटांनी एकमेकांच्या घरांवर दगडफेक केली. या दगडफेकीत दोन्ही गटांतील महिला व पुरुष जखमी झाले. त्यानंतर गावातील काही ग्रामस्थांनी हा वाद मिटविण्याचा प्रयत्न केला. मात्र, तो मिटला नाही. त्यानंतर रात्री उशिरा नगर तालुका पोलिस ठाण्यात दोन्ही गटांकडून परस्परविरोधी फिर्यादी देण्यात आल्या. एका गटातील महिलेने दिलेल्या फिर्यादीवरून आरोपी तीन जणांविरोधात गुन्हा दाखल केला आहे.

आरोपींनी बलात्कार करून तलवारीने मारहाण करीत घरावर दगडफेक केल्याचे या फिर्यादीत म्हटले आहे. दुसरी फिर्याद दुसऱ्या गटातील महिलेने दिली आहे. ती घरात एकटी असताना आरोपी दोघांनी घरात घुसून विनयभंग केला. घरावर दगडफेक केली. यातील चारही आरोपींना पोलिसांनी सोमवारी (ता. नऊ) रात्रीच अटक केली. एका गुन्ह्याचा तपास उपनिरीक्षक युवराज चव्हाण, तर दुसऱ्या गुन्ह्याचा तपास उपनिरीक्षक रणजित मारन करीत आहेत.