नेवासे : भेंड्यात पोलिस पथकावर हल्ला!

नेवासे : तोफखाना पोलिसांना फसवणुकीच्या गुन्ह्यात हव्या असलेल्या आरोपीला पकडण्यासाठी गेलेल्या तोफखाना व कुकाणे पोलिसांवर आरोपीसह त्याच्या कुटुंबातील सदस्यांनी हल्ला केल्याची घटना शनिवारी (ता. २२) सायंकाळी घडली. घटनेची माहिती समजताच पोलिस निरीक्षक बाजीराव पोवार यांच्या पथकाने घटनास्थळी जाऊन एका महिलेसह तिघांना अटक केली.

दरम्यान, हल्ला करून आरोपी फरार झाला. या प्रकरणी दोन महिलेसह पाच जणांविरोधात नेवासे पोलिसांत गुन्हा दाखल करण्यात आला आहे. फसवणूक प्रकरणात अहमदनगर शहरातील तोफखाना पोलिसांना पाहिजे असलेला नेवासे तालुक्यातील भेंडे येथील सागर मच्छिंद्र धनवटे याला पकडण्यासाठी शनिवारी दुपारी तोफखाना पोलिस ठाण्याचे पोलिस हेड कॉन्स्टेबल सुधीर क्षीरसागर, पोलिस कॉन्स्टेबल गौतम सातपुते, विशाल केदार व कुकाणे पोलिस दूरक्षेत्राचे पोलिस कॉन्स्टेबल अमोल साळवे हे भेंडे खुर्द येथे धनवडे यांच्या घरी गेले. पोलिसांना धनवटे हा घरीच मिळून आला. पोलिसांनी त्याला ताब्यात घेत असतानाच आरोपी सागर धनवडेसह त्याच्या कुटुंबीयांनी पोलिसांवर हल्ला चढवला.

दरम्यान, घटनेची माहिती समजताच पोलिस निरीक्षक बाजीराव पोवार यांचे नेतृत्वाखाली नेवासे पोलिसांच्या पथकाने घटनास्थळी धाव घेत आरोपी सागर याची पत्नी सुरेखा धनवडे, वडील मच्छिंद्र रामभाऊ धनवडे, व भाऊ सचिन ऊर्फ रुद्रा मच्छिंद्र धनवडे यांना ताब्यात घेत अटक केली. हल्ल्यानंतर सागर धनवडे व त्याची बहीण सोनाली कुसळकर हे फरार झाले.या प्रकरणी तोफखाना पोलिस ठाण्याचे पोलिस कॉन्स्टेबल गौतम सातपुते यांच्या फिर्यादीवरून वरील दोन महिलांसह पाच जणांविरोधात नेवासे पोलिसांत सरकारी कामात अडथळा आणल्यासह विविध कलमांन्वये गुन्हा दाखल करण्यात आला.