भाजपतही राष्ट्रवादीच्या आमदाराचा बोलबाला

भाळवणी : विधानसभेतील सहकारी आमदार नीलेश लंके हे कोरोना संकटाच्या काळात रुग्णांची करीत असलेली सेवा ही कौतुक व अभिमानास्पद आहे. त्यांचा आदर्श घेऊन राज्यात कोव्हिड सेंटर सुरू करावेत, असे सांगत आमदार लंके यांच्या कार्याचे चिखलीच्या भाजपाच्या आमदार श्वेताताई महाले यांनी कौतुक केले. (BJP MLAs appreciate Nilesh Lankes work)

भाळवणी येथे सुरू असलेल्या शरदचंद्र पवार कोव्हिड सेंटरला आमदार महाले यांनी भेट देऊन पाहणी केली. येथील रुग्णांना मिळणाऱ्या सुविधा पाहून त्यांनी समाधान व्यक्त केले. आमदार महाले म्हणाल्या की, विधानसभेतील सहकारी नीलेश लंके हे कोरोना रुग्णांसाठी करीत असलेले कार्य आपण ऐकून होतो. सर्वच सोशल मीडियावर आमदार लंके हे एकच नाव झळकत आहे.

प्रत्यक्ष या कोव्हिड सेंटरला भेट देण्याचा योग आला.येथील कोव्हिड सेंटर हेच आपले घर व कुटुंब असल्याचे मानून कोणत्याही जात, धर्म विचारधारा असा दुजाभाव न करता मतदारसंघाबाहेरीलही रूग्णांचीही आमदार लंके हे अहोरात्र सेवा करून रुग्णांना उपचारांबरोबरच मानसिक आधार देऊन त्यांची काळजी घेण्याचे काम करीत आहेत.

कोरोना रुग्णांना मानसिक आधार देऊन त्यांची आपुलकीने विचारपूस केल्यास तो रुग्ण कोरोनावर मात करू शकतो. आणि हीच बाब ओळखून आमदार लंके हे रुग्णांना उपचाराबरोबरच मानसिक आधार देण्याचे काम करीत आहेत ही कौतुकास्पद बाब आहे. आमदार लंके यांचा आदर्श घेऊन राज्यातही कोव्हिड सेंटर सुरू करावेत असे महाले म्हणाल्या.

यावेळी आमदार निलेश लंके प्रतिष्ठानचे सचिव ॲड. राहुल झावरे. राष्ट्रवादीच्या माहिती तंत्रज्ञान विभागाचे प्रदेशाध्यक्ष जितेश सरडे, बाळासाहेब खिलारी,अभयसिंह नांगरे,अनिल गंधाक्ते,प्रमोद गोडसे,सूरज भुजबळ आदी. यावेळी उपस्थित होते.
(BJP MLAs appreciate Nilesh Lankes work)