श्रीगोंद्यात का बदलतोय पिकांचा ट्रेंड... कुणी लावणार बाजरी, कुणी तुरी 

श्रीगोंदे : श्रीगोंद्यात एकेकाळी उसाचे जास्त प्रमाणात लागवडी होत होत्या. मात्र, मध्यंतरीच्या काळात पुन्हा कांदा, कापूस, डाळिंबासह भाजीपाला पिकांकडे शेतकरी वळला होता. कोरोनात भाजीपाला केलेल्या शेतकऱ्यांना फटका बसल्याने शेतकरी पुन्हा एकदा उसाकडे वळवण्याची शक्यता कृषी विभाग व्यक्त करतोय. शिवाय बाजरी व तुरीचे पीक नेहमीपेक्षा जास्त होईल, असाही अंदाज आहे. 
श्रीगोंद्याला उसाचे आगर म्हटले जात असले तरी यंदाचा साखर कारखान्यांचा हंगाम उसाअभावी बंद राहिला. धरणातील पाण्याची शाश्वती राहिली नाही. पावसाचा लहरीपणा वाढल्याने उसाचे क्षेत्र काही वर्षात कमी झाले. यंदा मात्र हे क्षेत्र वाढण्याची शक्यता कृषी विभागाने व्यक्त केली. कारण उन्हाळ्याच्या शेवटपर्यंत धरणांचे पाणी राहिले आणि आता कुकडीचे आवर्तन सुटणार असल्याने लागवडी जास्त होतील.

कोरोनात भाजीपाला पिकविणाऱ्या शेतकऱ्याचे हाल झाल्याने भाजीपालापेक्षा इतर पिके घेवू व बदल म्हणून बाजरी व तुरीची पेरणीला महत्व येवू शकते असेही सांगण्यात आले. फळबागेत लिंबू, द्राक्ष वाढण्याची शक्यता आहे. पूर्वी पारगाव सुद्रीक गावात असणारे द्राक्ष आता तालुक्यातील गावांमध्ये वाढत अाहे. यंदा त्यात वाढ होणार आहे. कापसाकडे वळालेला शेतकरी पुन्हा एकदा ऊस व फळबागेकडे जाईल. यंदाच्या वर्षी पावसाला सुरुवात झाल्याने बाजरी व तुरीचे बियाणे खरेदी करण्यासाठी शेतकरी सरसावत असल्याचे दिसते. 

यंदा पावसाचे दिवस चांगले असले तरी खतांमध्ये युरियाचे उत्पादन कारखाने बंद असल्याने अडचणीत येण्याची शक्यता आहे. तसे झाल्यास शेतकऱ्यांनी इतर खतांचा वापर करावा. बियाणे खरेदी करताना मूळ पावतीच घ्यावी. 
- पदनाभम म्हस्के, तालुका कृषी अधिकारी, श्रीगोंदे.