अपराध माझा असा काय झाला..? पॉलिहाऊस उद्‌ध्वस्त झालेल्या शेतकऱ्याची भावना 

नगर : ""वाडवडिलांची चार-पाच एकर शेती. "दोन घास कमी, पण कर्ज काढायचं नाही हा मायबाबाचा सल्ला आम्ही ऐकला नाही. सुधारित शेती करायची हौस म्हणून कर्ज काढून पॉलिहाऊस उभारले; पण "निसर्ग'ने होत्याचे नव्हते केले. तब्बल पन्नास लाखांचे नुकसान केले. सुधारित शेतीसाठी पॉलिहाऊस उभारलं... त्यात आमचा काय गुन्हा?'' देहरे (ता. नगर) येथील प्रगतिशील शेतकरी बलभीम पठारे यांनी हा प्रश्न उपस्थित केला आहे. त्यांनी व्यक्त केलेल्या भावनांतून नुकसानीची वास्तवता समोर येत आहे. 

हेही वाचा- यंदा आबादीआबाद.. या कारणामुळे भरणार धरणे लवकर 

नगर-मनमाड रस्त्यावरील देहरे येथे पठारे यांची शेती. पारंपरिक शेती करणाऱ्या पठारे यांनी सहा वर्षांपूर्वी मोठा खर्च करून एक एकर क्षेत्राचे सुमारे सहा, तर अर्ध्या एकर क्षेत्राचे सुमारे दोन असे आठ पॉलिहाऊस उभे केले. येथे नियमित पंचवीस मजूर काम करत आहेत. त्यात पहिल्या दोन वर्षी ढोबळी मिरची, काकडीचे उत्पादन घेतले. मात्र, त्यातून होणारा खर्चही निघत नसल्याने चार वर्षांपासून शोभेची झाडे तयार करण्याचे काम केले जाते. 

सोशल मीडियावर पत्र व्हायरल 

आता कुठे पॉलिहाऊसच्या शेतीला चांगले दिवस आले असताना मागील आठवड्यात निसर्ग चक्रीवादळाचा तडाखा बसला आणि पठारे यांचे सर्व पॉलिहाऊस उद्‌ध्वस्त झाले. त्यात सुमारे चाळीस लाखांचे आणि अनेक दिवसांपासून जोपासलेल्या शोभेच्या झाडांचे वीस लाखांचे नुकसान झाले. हतबल झालेल्या पठारे यांनी तब्बल सहा दिवसांनी पॉलिहाऊस उत्पादक म्हणून भावना मांडणारे पत्र लिहिले आणि ते सोशल मीडियावर व्हायरल झाले. अनेक नुकसानग्रस्त शेतकऱ्यांच्याच भावना पठारे यांच्या रूपाने व्यक्त झाल्या. 

पॉलिहाऊस उभारणाऱ्यांना कर्जमाफी नाही 

शेतकऱ्यांची कर्जे माफ झाली, पॉलिहाऊस उभारणाऱ्यांची नाही. त्यामुळे मी आणि माझ्यासारखे हजारो आधुनिक शेतकरी कुठे चुकले? पॉलिहाऊस उभारून की आधुनिकतेची कास धरून, असा प्रश्न पठारे यांनी पत्रात उपस्थित केला आहे. 

शंभर पॉलिहाऊस उद्‌ध्वस्त 

नगर जिल्ह्यात निसर्ग चक्रीवादळाने सर्वाधिक नुकसान पॉलिहाऊस, शेडनेटचे झाले असून, संगमनेर, पारनेर, अकोले, नेवासे, नगर, पाथर्डी, राहाता यांसह अन्य ठिकाणी मिळून सुमारे शंभर पॉलिहाऊस, शेडनेट उद्‌ध्वस्त झाले आहेत. नुकसानीची रक्कम कोट्यवधीच्या घरात आहे. विशेष म्हणजे सर्वच पॉलिहाऊस, शेडनेट उभारणाऱ्या शेतकऱ्यांनी बॅंकांचे कर्ज घेतलेले आहे. 

शेतकरी कायमचे उद्धवस्त होतील 

माझ्यासारखी अनेक शेतकऱ्यांची अवस्था आहे. उद्‌ध्वस्त झालेल्या सर्वच पॉलिहाऊसधारकांना सरकारने मदतीचा हात दिला नाही, तर सुधारित शेती करणारे शेतकरी कायमचे उद्‌ध्वस्त होतील. 
- बलभीम पठारे, प्रगतिशील शेतकरी, देहरे ता. नगर, जि. नगर 

नुकसानीचे पंचनामे केले 

शेतकऱ्यांनी नवीन तंत्रज्ञान वापरून शेती केली पाहिजे. त्यासाठी कृषी विभाग प्रयत्नशील आहे. नैसर्गिक हानीला कोणी काही करू शकत नाही. पॉलिहाऊस, शेडनेट व शेतपीके नुकसानीचे पंचनामे केले असून, अहवाल वरिष्ठांना दिला आहे. 
- शिवाजी जगताप, जिल्हा अधीक्षक कृषी अधिकारी, नगर