Graduate Constituency Election : पदवीधरसाठी एक लाख १६ हजार ३१९ मतदार

अहमदनगर : केंद्रीय निवडणूक आयोगाने नाशिक पदवीधर मतदारसंघाची निवडणूक गुरुवारी जाहीर केली. त्यामुळे आचारसंहिता लागू झाली आहे. ३० जानेवारीला मतदान होणार असून, १ लाख १६ हजार ३१९ मतदार आहेत.

उमेदवारी अर्ज दाखल करेपर्यंत मतदारांना नोंदणी करता येणार आहे. निवडणुकीसाठी मोठ्या गावांसह महसूल मंडल पातळीवर १४७ मतदान केंद्रे राहणार आहेत, अशी माहिती जिल्हाधिकारी तथा सहायक निवडणूक निर्णय अधिकारी डॉ. राजेंद्र भोसले यांनी पत्रकार परिषदेत दिली.

महानगरपालिका आयुक्त डॉ. पंकज जावळे, निवडणूक शाखेचे उपजिल्हाधिकारी जितेंद्र पाटील, नायब तहसीलदार गोसावी यावेळी उपस्थित होते. डॉ. भोसले म्हणाले, की नाशिक पदवीधर मतदारसंघाच्या निवडणुकीची अधिसूचना ५ जानेवारी रोजी जाहीर करण्यात येणार आहे.

त्याच दिवसापासून १२ जानेवारीपर्यंत उमेदवारी दाखल करता येणार आहे. १६ जानेवारीपर्यंत अर्ज मागे घेता येतील. छाननी प्रक्रिया पूर्ण करून ३० जानेवारीला मतदान होईल. २ फेब्रुवारीला मतमोजणी होऊन ४ फेब्रुवारीपर्यंत निवडणुकीची प्रक्रिया पूर्ण करण्यात येणार आहे.

नाशिकचे विभागीय आयुक्त राधाकृष्ण गमे निवडणूक निर्णय अधिकारी म्हणून काम पाहणार आहेत. नाशिक विभागातील पाच जिल्हाधिकारी हे सहायक निवडणूक निर्णय अधिकारी म्हणून काम पाहणार आहेत.

जिल्हास्तरावर आचारसंहिता कक्ष, व्हिडिओग्राफी कक्ष आदींची स्थापना करण्यात येणार आहे. तालुकास्तरावर निवडणुकीच्या देखरेखीसाठी तहसीलदारांच्या अध्यक्षतेखाली तीन पथके नियुक्त करण्यात येणार आहेत.

जिल्ह्यातील १ हजार ६९३ मतदारांची नोंदणी नाकारण्यात आलेली आहे. अर्जामध्ये अपूर्ण माहिती, फोटो नसणे, मतदार नोंदणी अर्जावर सही नसणे, दुबार नोंदणी करणारे, दुसऱ्या मतदारसंघातील रहिवासी असणे, ऑनलाइन आणि ऑफलाइन अशा दोन्ही पद्धतींनी अर्ज सादर केल्याने अर्ज बाद केले आहेत.

- जितेंद्र पाटील, उपजिल्हाधिकारी, निवडणूक शाखा