मी पस्तीस वर्षे हटत नसतो, आमदार लंकेंनी सांगितला राजयोग

पारनेर ः ‘‘मला पस्तीस वर्षे राजयोग आहे. माझ्या आरोग्याचा विचार करणाऱ्यांनी चिंता करू नये. कोरोनाच्या संकटात अनेकांचे संसार उद्‍ध्वस्त झाले, तरी काही महाभागांनी संकटात मदत करण्याऐवजी त्रास दिला. अशा प्रकारे त्रास देणाऱ्या व गोरगरिबांची लूट करणाऱ्यांचा परमेश्‍वरच कार्यक्रम केल्याशिवाय राहाणार नाही,’’ असा टोला आमदार नीलेश लंके यांनी विरोधकांना मारला.

वडगाव आमली येथे विविध विकासकामांच्या उद्‍घाटनप्रसंगी आमदार लंके बोलत होते. कोरोनाच्या संकटातही मतदारसंघातील विविध विकासकामांसाठी मी सतत्याने प्रयत्न करून मोठा निधी आणला आहे. तालुक्यातील एकही गाव विकासापासून वचित राहणार नाही, असेही लंके म्हणाले. (I-will-be-Parners-MLA-for-thirty-five-years)

या वेळी लंके कोरोना काळात आलेल्या दुःखद व धक्कादायक आठवणी कथन करताना भावनिक झाले होते. त्यांनी स्व. गुलाबराव डेरे यांच्या आठवणींना उजाळा दिला. यावेळी संभाजी रोहकले, सरपंच अमोल पवार, अॅड. राहुल झावरे, बापू शिर्के, श्रीकांत चोरे, संदीप रोहकले, गोवर्धन रोहकले, सूरज भुजबळ, प्रमोद गोडसे, भाऊसाहेब पटेकर, साहेबराव पवार, नवनाथ जाधव, नवनाथ ढोणे आदींसह मोठ्या संखेने ग्रामस्थ उपस्थित होते.

कोविड सेंटरची देशभरात दखल

आमदार नीलेश लंके यांनी भाळवणी येथे उभारलेल्या कोविड सेंटरची देशभरात चर्चा झाली. कोविड रूग्णांसाठी लंके यांनी वाहून घेतले होते. ते मुक्कामालाच कोविड सेंटरमध्ये थांबायचे. पवार कुटुंबीयांनीही त्यांच्या कामाची दखल घेतली होती. उत्तर प्रदेशातील योगी आदित्यनाथ सरकारनेही आपले प्रतिनिधी पाठवून कोविड सेंटरच्या उभारणीची माहिती घेतली होती.

साई संस्थानच्या अध्यक्षपदाच्या शर्यतीत नाही

साईबाबा फकीर होते. मीही फकीर आहे. मग अध्यक्ष होऊन संस्थानची वाहने व इतर सुविधा घेऊन मला पापाचा धनी व्हायचे नाही. संस्थानचा अध्यक्ष होऊन माझी कामे मी करणार, हे योग्य नाही. साई संस्थानच्या अध्यक्षपदाच्या शर्यतीत मी नाही, असे सांगून आमदार लंके यांनी या विषयावर पडदा टाकला. ((I-will-be-Parners-MLA-for-thirty-five-years))